Dünya birjalarında qəhvə bazarında kəskin bahalaşma qeydə alınıb. Arabika növü üzrə qəhvə fyuçersləri son hərraclarda təxminən 5% yüksələrək mart ayından bu yana ilk dəfə bir ton üçün 7000 dollar həddini keçib.
Məlumata görə, sentyabr fyuçersləri bir mərhələdə 7016 dollar/ton səviyyəsinə qədər yüksəlib, daha sonra isə 6979 dollar/ton ətrafında dəyişib.
Qeyd olunur ki, arabika qəhvəsi ardıcıl dörd həftədir bahalaşır və təkcə son həftə ərzində qiymətlər 10%-dən çox artıb.
Eyni zamanda, robusta qəhvəsi üzrə də artım müşahidə olunub. Sentyabr fyuçersləri 5,76% yüksələrək 3891 dollar/ton səviyyəsinə çatıb.
Analitiklər bu tendensiyanı əsasən əlverişsiz hava şəraiti, tədarük zəncirində risklər və qlobal tələb üzrə qeyri-müəyyənliklə əlaqələndirirlər. Qeyd olunur ki, qəhvə bazarında davam edən bahalaşma yaxın dövrdə istehlak bazarlarında qiymət təzyiqlərini artıra bilər.
MONETAR.AZ
