Azərbaycanda 2026-cı il üzrə taxıl biçini yekun mərhələyə daxil olub. Kənd Təsərrüfatı Nazirliyi yanında fəaliyyət göstərən taxıl biçini üzrə Mərkəzi Qərargahın operativ məlumatına əsasən, iyulun 21-dək ölkə üzrə payızlıq taxıl sahələrinin 86 faizində biçin işləri tamamlanıb.
Mövsümün əvvəlindən indiyədək 827 min 625 hektar sahədə biçin aparılıb və bu ərazilərdən ümumilikdə 2 milyon 877 min 903 ton məhsul əldə olunub. Hazırda ölkə üzrə orta məhsuldarlıq hər hektara 34,8 sentner təşkil edir ki, bu da ötən ilin eyni dövrü ilə müqayisədə 1,7 sentner çoxdur.
Biçin işlərinin nəticələrinə görə, 365 min 154 hektar buğda və 462 min 471 hektar arpa sahəsi yığılıb. Bu sahələrdən 1 milyon 371 min 200 ton buğda və 1 milyon 506 min 703 ton arpa tədarük olunub.
Hazırda buğda əkinlərinin 79,4 faizində, arpa sahələrinin isə 92,1 faizində biçin başa çatıb. Orta məhsuldarlıq buğda üzrə hər hektara 37,6 sentner, arpa üzrə isə 32,6 sentner təşkil edir.
Artıq Ucar, Ağdaş, Bərdə, Biləsuvar, Cəlilabad, Kürdəmir, Yevlax, Lənkəran, Masallı, Neftçala, Sabirabad, Salyan, Naftalan, Göyçay, Tərtər, Kəlbəcər və Şuşa daxil olmaqla 17 şəhər və rayonda taxıl biçini tam yekunlaşıb. Ağsu, Ağdam, Ağcabədi, Ağstafa, Astara, Balakən, Beyləqan, Goranboy, İmişli, Qazax, Qəbələ, Zərdab, Saatlı, Samux, Siyəzən və Şəkidə isə biçin kampaniyası son mərhələyə yaxınlaşır.
Kənd Təsərrüfatı Nazirliyi respublika üzrə taxıl biçininin hava şəraiti və texniki imkanlar nəzərə alınmaqla optimal müddətdə tam başa çatdırılacağını proqnozlaşdırır.
