ABŞ-da inflyasiyanın gözləniləndən yüksək olması Federal Ehtiyat Sisteminin (FED) gələn ay faiz dərəcələrini yenidən artıracağına dair gözləntiləri gücləndirib. Bu fonda dollar mövqelərini möhkəmləndirib, Asiya valyutalarının əksəriyyəti isə həftənin əvvəlindən yaranan itkiləri qoruyub saxlayıb.
Bu gün Bakı vaxtı ilə saat 08:12-yə olan məlumata görə, dollar indeksi 0,1% artaraq 103,048 bəndə yüksəlib. Bununla da indeks 2025-ci ilin aprel ayının əvvəlindən bəri ən yüksək səviyyəsini yeniləyib. Əvvəlki ticarət sessiyasında isə dollar indeksi 0,7% bahalaşmışdı.
Yapon yeni də dollar qarşısında zəif mövqedə qalıb. USD/JPY valyuta cütlüyü əvvəlki sessiyada 0,7% artaraq 159,93 səviyyəsinə çatdıqdan sonra dəyişməyərək 159,74 həddində ticarət olunub.
ABŞ və Yaponiya arasında faiz dərəcələri fərqinin geniş olması dolların mövqeyini dəstəkləyən əsas amillərdən biri olaraq qalır. Bu amil Yaponiya Bankının pul-kredit siyasətini daha da sərtləşdirəcəyi ilə bağlı gözləntilərin təsirini zəiflədir.
Valyuta bazarının iştirakçıları dolların 160 yen həddinə çatmasını xüsusi diqqətlə izləyirlər. Bu psixoloji baxımdan mühüm səviyyə əvvəllər Yaponiya hakimiyyətinin valyuta bazarına müdaxiləsi ilə əlaqələndirilib.
Vaşinqton və Tokionun iyulun sonunda həyata keçirdiyi koordinasiyalı addımlardan sonra yeni müdaxilə ehtimalı da gündəmdədir. Həmin vaxt ABŞ 1998-ci ildən bəri ilk dəfə yenin dəstəklənməsi istiqamətində Yaponiyaya qoşulmuşdu.
Birgə müdaxilə nəticəsində yen müvəqqəti olaraq möhkəmlənmiş, dolların məzənnəsi təxminən 164 yen səviyyəsindən 155 yenə qədər geriləmişdi. Lakin sonradan iki ölkə arasındakı faiz fərqinin qorunması və ABŞ-da monetar siyasətin daha da sərtləşdiriləcəyi gözləntiləri dolları yenidən gücləndirib. Nəticədə Yaponiya valyutası əvvəlki qazancının böyük hissəsini itirib.
Digər Asiya valyutalarında da fərqli dinamika müşahidə olunub. Avstraliya dolları yeddi aylıq minimuma yaxın səviyyədə qalaraq dəyişməyib. Çin yuanının həm ölkə daxilində, həm də ofşor bazarda ticarət olunan məzənnələri əsasən sabit olub.
Cənubi Koreya vonu dollar qarşısında 0,5% ucuzlaşıb. Sinqapur dolları 0,1% dəyər itirib, Hindistan rupisi isə 0,2% möhkəmlənib.
MONETAR.AZ
