“Barclays” Avropa farmasevtika sektoruna dair mövqeyini “neytral” səviyyəsinə endirsə də, 2027-ci ilə qədər iri kapitallaşmalı şirkətlər arasında “AstraZeneca” və “Roche” səhmlərinə üstünlük verməkdə davam edir. Bank hər iki şirkət üzrə “bazardan yuxarı” (Outperform) reytinqini saxlayıb.
“Barclays”ın sektora daha ehtiyatlı yanaşmasının əsas səbəbləri gələn il son mərhələ klinik sınaqlarının nəticələrinin açıqlanması üzrə qrafikin nisbətən zəif görünməsi, gəlirlərin artım tempinin yavaşlaması və 2031–2032-ci illərdə patent müddətlərinin başa çatması ilə bağlı təzyiq dalğasının yaxınlaşmasıdır.
“AstraZeneca” üzrə “Barclays” 2028-ci il üçün proqnozlaşdırılan baza mənfəətinə 17 dəfə multiplikator tətbiq edərək səhmlər üçün hədəf qiymətini 165 funt-sterlinqdən 160 funt-sterlinqə endirib. Bu düzəliş “Wainua” preparatının kardiomiopatiyanın müalicəsində uğursuz nəticə göstərməsi fonunda gəlir proqnozlarının cüzi aşağı salınması ilə əlaqələndirilir.
Bununla belə, broker “AstraZeneca” üçün “bazardan yuxarı” reytinqini şirkətin orta müddətli mənfəət artımı perspektivləri ilə əsaslandırır. Belə ki, 2028–2032-ci illərdə şirkətin baza mənfəətinin orta illik artım tempinin 7,4% olacağı proqnozlaşdırılır. Bu göstərici iri kapitallaşmalı şirkətlər üzrə 4%-lik median artım tempindən xeyli yüksəkdir. “Barclays” həmçinin “AstraZeneca”nın son mərhələdə olan preparatlar portfelini analoqları arasında ən güclülərdən biri kimi qiymətləndirir.
Şirkətin səhmlərinin yenidən bahalaşmasına əsas təkan verə biləcək amillər III faza klinik sınaqlarının nəticələri olacaq. Buraya ağciyər xərçənginin müalicəsində “Datroway”, süd vəzi xərçəngində “camizestrant”, dislipidemiya üzrə “Laroprovstat”, xroniki böyrək xəstəliyində “Zibotentan”, prostat xərçəngində “Saruparib”, endometrium xərçəngində “Puxi-Sam” və xroniki böyrək xəstəliyi olan pasiyentlərdə ürək-damar risklərinin azaldılmasına yönələn “Balcinrenone” daxildir. “Barclays”ın fikrincə, bu preparatlar üzrə müsbət nəticələr şirkətin gələcəkdə milyardlarla dollarlıq pik satış əldə etməsi ilə bağlı riskləri əhəmiyyətli dərəcədə azalda bilər.
“AstraZeneca” üçün əsas risklər isə “Datroway”ın AVANZAR və “camizestrant”ın SERENA-4 tədqiqatlarından gözlənilən nəticələrin məyusedici olması, preparatların kommersiya baxımından zəif təşviqi və əlavə investisiyalardan gözlənilən əməliyyat səmərəliliyinin əldə edilməməsidir.
“Roche” ilə bağlı isə “Barclays” daha optimist mövqe nümayiş etdirib. Bank 2028-ci il üçün proqnozlaşdırılan baza mənfəətinə 18 dəfə multiplikator tətbiq etməklə səhmlərin hədəf qiymətini 410 İsveçrə frankından 430 İsveçrə frankına yüksəldib. Bu qiymət iri kapitallaşmalı şirkətlər üçün sahəvi multiplikatorla müqayisədə təxminən 34%-lik mükafatı nəzərdə tutur. Proqnozlardakı dəyişikliklər isə əsasən valyuta məzənnələrindəki dalğalanmaları və yeni preparatların bazara çıxarılması ilə bağlı yenilənmiş fərziyyələri əks etdirir.
“Barclays”ın fikrincə, “Roche”un daha yüksək qiymətləndirilməsi bir neçə amillə bağlıdır. Şirkətin 2028–2032-ci illərdə baza mənfəətinin orta illik artım tempinin 5,1% olacağı gözlənilir ki, bu da sektor üzrə 4%-lik median göstəricidən yüksəkdir. Bundan başqa, 2031-ci ildən sonrakı dövrdə patentlərin başa çatması ilə bağlı təzyiqin şirkət üçün nisbətən məhdud olacağı və “Roche”un diaqnostika biznesinin davamlılığının şirkəti yalnız farmasevtik fəaliyyət göstərən rəqiblərlə müqayisədə daha dayanıqlı etdiyi vurğulanır.
“Roche” səhmləri üçün əsas yüksəliş potensialı “giredestrant” və “fenebrutinib” preparatlarının bazara gözləniləndən daha uğurlu çıxış etməsi ilə bağlıdır. Bundan əlavə, ER-müsbət, HER2-mənfi metastatik süd vəzi xərçənginin birinci xətt müalicəsində “giredestrant” və xoralı kolitin müalicəsində “Afimkibart” üzrə klinik sınaqlardan müsbət nəticələrin əldə olunması şirkətin səhmləri üçün əlavə katalizator yarada bilər.
Bunun əksinə, “Roche” üçün əsas aşağı yönlü risklər klinik sınaqlarda məyusedici nəticələrin açıqlanması, xüsusilə “Vabysmo” kimi artıq bazarda olan preparatların ödəyicilər tərəfindən qiymət və ödəniş təzyiqi ilə üzləşməsi, eləcə də patent mühafizəsi başa çatdıqdan sonra şirkətin aktivlərinin dəyərinin proqnozlaşdırılandan daha sürətlə azalmasıdır.
