Çində birhəftəlik bayram fasiləsindən sonra ticarət bərpa olunsa da, dəmir filizi bazarında qiymət enişi davam edir. Artıq təklif və zəif tələbat fonunda fyuçerslər ardıcıl üçüncü həftədir ucuzlaşır.
Sinqapur birjasında dəmir filizi fyuçersləri bu gün 2024-cü ilin sentyabrından bəri ən aşağı səviyyəyə düşüb. Daha sonra qiymətlər ton üçün təxminən 90,90 dollar ətrafında qərarlaşıb.
Tədarükün real tələbatı üstələməsi nəticəsində Çinin limanlarında dəmir filizi ehtiyatları 152,7 milyon tona yüksəlib. Eyni zamanda, polad istehsalçılarının gəlirliliyi aşağı səviyyədə qalır.
Analitiklərin məlumatına görə, Çində poladəritmə zavodlarının 7%-dən də azı hazırda mənfəətlə işləyir. Zəif marjalar və aşağı rentabellik müəssisələri istehsal həcmlərini azaltmağa sövq edə bilər. Bu isə dəmir filizinə olan tələbatı daha da zəiflədə bilər.
“Yongan Futures” analitik mərkəzinin ekspertləri dördüncü rübdə dəmir filizi bazarında ucuzlaşma meylinin üstünlük təşkil edəcəyini proqnozlaşdırırlar.
Beləliklə, yüksək ehtiyatlar, zəif polad istehsalı və məhdud gəlirlilik dəmir filizi qiymətlərinin yaxın müddətdə təzyiq altında qalmasına səbəb olan əsas amillər kimi qiymətləndirilir.
MONETAR.AZ
