Litium bazarında son illərin ən kəskin qiymət korreksiyalarından biri davam edir. Çinin Quançjou Birlik Əmtəə Birjasında (GFEX) ən aktiv ticarət olunan litium karbonat fyuçerslərinin qiyməti hərraclar zamanı qısa müddətə 100 000 yuan (14 942 dollar) psixoloji həddindən aşağı düşüb.
Litiumun qiyməti son bir həftədə təxminən 14%, son yeddi həftədə isə 37% ucuzlaşıb. Qiymətlərdəki kəskin geriləmə elektromobil (EV) akkumulyatorları istehsalı zəncirində tələbatla bağlı narahatlıqları gücləndirib.
Litiumun qiymətindəki son enişə ticarət məhdudiyyətləri ilə yanaşı, bazarda gələcək təklif və tələbat balansına dair proqnozlar da təsir edib.
Avropa İttifaqı (Aİ) ilə Çin arasında hibrid avtomobillərin Avropa bazarına ixracının məhdudlaşdırılması ilə bağlı əldə olunan razılaşma litiuma qlobal tələbatın gələcək perspektivləri barədə gözləntilərə mənfi təsir göstərib.
Bununla yanaşı, analitiklər bazarda xammal təklifinin artması ehtimalını da qiymətləndirirlər.
“Goldman Sachs” investisiya bankının ötən həftə dərc etdiyi hesabata görə, litium bazarında cari ilin dördüncü rübündə mövcud defisit aradan qalxaraq təklif və tələbat arasında tarazlıq yarana bilər. Bank 2027–2028-ci illərdə isə bazarda xammal profisitinin formalaşacağını proqnozlaşdırır.
Bu gözləntilər qiymətlərin daha da aşağı düşə biləcəyi ilə bağlı narahatlıqları artırır.
Litiumun qiymətindəki kəskin geriləmə xammal hasilatçıları və akkumulyator istehsalçılarının gəlirlilik marjalarına təzyiq göstərir. Bununla belə, qiymətlərin aşağı düşməsi uzunmüddətli perspektivdə elektromobillərin istehsal xərclərinin azalmasına şərait yarada bilər.
Bazarda qiymətlərin gələcək dinamikası isə elektromobillərə tələbatın dəyişməsindən, litium istehsalının həcmindən və qlobal təklif-tələbat balansından asılı olacaq.
MONETAR.AZ
