Dünyanın aktivlərinə görə ən böyük 4 bankı Çində fəaliyyət göstərir. ABŞ-ın ən böyük bankı JPMorgan Chase isə 4,42 trilyon dollarlıq aktivlərlə qlobal reytinqdə beşinci yerdə qərarlaşıb.
Monetar.az xəbər verir ki, “S&P Global Market Intelligence” şirkətinin 2026-cı ilin aprelində açıqladığı, əsasən 2025-ci ilin maliyyə göstəricilərinə əsaslanan reytinqə görə, dünyanın ən böyük bankı “Industrial and Commercial Bank of China”dır. Bankın aktivləri 7,65 trilyon dollar təşkil edir.
İkinci yerdə 6,97 trilyon dollarlıq aktivlərlə “Agricultural Bank of China”, üçüncü yerdə 6,52 trilyon dollarla “China Construction Bank”, dördüncü yerdə isə 5,48 trilyon dollarla “Bank of China” qərarlaşıb.
Çinin 4 ən böyük bankının ümumi aktivləri 26 trilyon dolları ötür. Bu məbləğ ABŞ-ın beş ən böyük bankının ümumi aktivlərindən təxminən iki dəfə çoxdur.
Reytinqdə ABŞ-ın “Bank of America” bankı 3,41 trilyon dollarla altıncı, Fransanın “BNP Paribas” bankı 3,28 trilyon dollarla yeddinci, Böyük Britaniyanın “HSBC” bankı isə 3,21 trilyon dollarla səkkizinci yerdədir. Beləliklə, “BNP Paribas” aktivlərinin həcminə görə Avropanın ən böyük bankına çevrilib.
Çin banklarının böyük aktiv həcmi ölkədəki əmanətlərin miqyası, dövlətin iqtisadiyyatda rolu və strateji sahələrin kreditləşdirilməsi ilə əlaqələndirilir. 2026-cı ilin martında Çin hökuməti “Industrial and Commercial Bank of China” və “Agricultural Bank of China”nın kapitalını gücləndirmək üçün 300 milyard yuan həcmində xüsusi dövlət istiqrazlarının buraxılmasını planlaşdırdığını açıqlayıb.
ABŞ bankları isə gəlirlərinin əhəmiyyətli hissəsini investisiya bankçılığı, qiymətli kağızların alqı-satqısı və aktivlərin idarə edilməsindən əldə edir. Məsələn, JPMorgan Chase 2025-ci ildə 57 milyard dollar xalis mənfəət əldə edib.
Reytinqdə bankların ümumi aktivlərinin həcmi əsas götürülür. Bu göstərici bankın maliyyə miqyasını əks etdirsə də, onun gəlirliliyini birbaşa müəyyən etmir.
