Dünya əmtəə birjalarında misin qiymətində cüzi azalma olub. London Metal Birjasında (LME) mis müqavilələri 0,34% ucuzlaşaraq bir ton üçün 14 287,97 dollar təşkil edib. Həftəlik yekunlara görə, birjada misin qiyməti 0,49% geriləyib.
Nyu-York Əmtəə Birjasında (Comex) isə mis fyuçersləri 0,11% azalaraq bir funt üçün 6,4930 dollara enib. Həftə ərzində Comex-də misin qiyməti 1,38% ucuzlaşıb.
Bazar iştirakçılarının diqqət yetirdiyi əsas göstəricilərdən biri Çinə idxal olunan misə görə ödənilən Yanşan mükafatıdır (Yangshan Premium). “Mysteel”in məlumatına görə, bu göstərici 2017-ci ildən bəri ən yüksək səviyyəyə çatıb.
Yanşan mükafatının yüksəlməsi Çində fiziki misə tələbatın vəziyyətini qiymətləndirmək üçün mühüm siqnal hesab olunur. Göstəricinin artması alıcıların metalın ölkəyə çatdırılması üçün daha yüksək əlavə haqq ödəməyə hazır olduğunu göstərir.
“Minmetals Futures” şirkətinin əsas metallar üzrə tədqiqatlar şöbəsinin rəhbəri U Kuncinin fikrincə, ABŞ-ın mümkün gömrük rüsumları ilə bağlı qeyri-müəyyənlik və qış mövsümünün yaxınlaşması Çində mis istehlakını zəiflədə bilər.
Onun qiymətləndirməsinə görə, bu amillər bazarda mövcud olan təklif çatışmazlığını müəyyən dərəcədə azalda bilər.
Belədə, mis bazarında qiymətlərin istiqaməti Çində fiziki tələbatın dinamikası, mümkün ticarət məhdudiyyətləri və mövsümi istehlak dəyişikliklərindən asılı olaraq qalır.
MONETAR.AZ
