Dünyanın 31 ölkəsində keçirilən sorğunun nəticələrinə görə, insanlar ən çox həkimlərə, alimlərə və müəllimlərə etibar edirlər. Siyasətçilər və sosial media fenomenləri isə etimad reytinqinin son pillələrində qərarlaşıblar.
Monetar.az xəbər verir ki, “Ipsos” şirkətinin 2026-cı il üzrə Qlobal Etimad İndeksi 31 ölkədən 23 537 nəfərin iştirak etdiyi sorğu əsasında hazırlanıb.
Reytinqdə həkimlər 43 faiz bəndi ilə ilk sırada yer alıblar. Alimlər 42 faiz bəndi ilə ikinci, müəllimlər isə 37 faiz bəndi ilə üçüncü olublar. Sorğuda iştirak edən 31 ölkədən 27-də bu üç peşə etimad baxımından ilk üç yeri tutub.
Dördüncü yerdə 16 faiz bəndi ilə silahlı qüvvələr qərarlaşıb. Şəxsi məşqçilər 10, texnologiya sahəsində fəaliyyət göstərən sahibkarlar 6 faiz bəndi ilə müsbət göstərici əldə ediblər. Hakimlər və polis əməkdaşlarının hər biri 5 faiz bəndi ilə növbəti yerləri bölüşüblər.
Vəkillər üzrə etimad və etimadsızlıq göstəriciləri bərabər olub. Sorğuda bu peşənin xalis etimad göstəricisi sıfır faiz bəndi təşkil edib.
Siyasətçilərə etimad ən aşağı səviyyədədir
Reytinqin sonuncu pilləsində mənfi 48 faiz bəndi ilə siyasətçilər qərarlaşıblar. Sorğu iştirakçılarının yalnız 13%-i siyasətçiləri etibarlı hesab edib, 61%-i isə onlara etibar etmədiyini bildirib.
Sosial media fenomenləri mənfi 44 faiz bəndi ilə sondan ikinci yerdədir. Hökumət nazirləri mənfi 37, reklam rəhbərləri isə mənfi 26 faiz bəndi ilə aşağı sıralarda qərarlaşıblar.
Jurnalistlər və bankirlər üzrə göstərici mənfi 10 faiz bəndi, din xadimləri üzrə isə mənfi 11 faiz bəndi olub. Televiziya xəbər aparıcıları mənfi 3, sorğu mütəxəssisləri isə mənfi 2 faiz bəndi ilə qiymətləndirilib.
Eyni sahədə çalışanlara münasibət fərqlənir
Sorğunun nəticələri dövlət idarəçiliyi daxilində də etimad fərqinin olduğunu göstərir. Dövlət qulluqçularının xalis etimad göstəricisi mənfi 9 faiz bəndi olduğu halda, hökumət nazirlərində bu rəqəm mənfi 37 faiz bəndi təşkil edib. Aradakı fərq 28 faiz bəndidir.
Media sahəsində də oxşar mənzərə müşahidə olunur. Televiziya xəbər aparıcılarının göstəricisi mənfi 3, jurnalistlərin göstəricisi mənfi 10, sosial media fenomenlərinin göstəricisi isə mənfi 44 faiz bəndidir.
