Dünya bazarında xam neftin qiyməti bazar ertəsi keçirilən ticarətdə bir barel üçün təxminən 82,5 ABŞ dolları səviyyəsində qərarlaşıb. Beləliklə, neft kotirovkaları son beş həftənin ən yüksək səviyyəsində qalmaqdadır.
MONETAR.AZ xəbər verir ki, bazarda qiymət dinamikasına Yaxın Şərqdə gərginliyin artması və diplomatik səylərin yenidən gündəmə gəlməsi təsir göstərir.
Məlumata görə, İranın dəstəklədiyi Yəməndəki husi hərəkatı Səudiyyə Ərəbistanından dəniz daşımalarına qadağa tətbiq etdiyini açıqlayıb. Bu isə Qırmızı dəniz vasitəsilə enerji daşımalarının təhlükəsizliyi ilə bağlı narahatlıqları artırıb. Eyni zamanda, Küveytdə neft tankerləri və enerji obyektlərinə son hücumlar da tədarük risklərini yüksəldib.
Digər tərəfdən, ABŞ ilə İran arasında kövrək sülh razılaşmasının bərpası məqsədilə vasitəçilərin hərbi əməliyyatların 10 günlük dayandırılması təklifini irəli sürdüyü bildirilir. İran da gərginliyin azaldılmasına yönəlmiş diplomatik təkliflər aldığını təsdiqləyib.
Bununla belə, kommersiya gəmilərinə yeni hücumlardan sonra Hörmüz boğazından dəniz daşımalarının ciddi şəkildə pozulduğu qeyd edilir.
