Dünya bazarında qızılın qiyməti bu gün əhəmiyyətli dəyişiklik göstərməyib. İnvestorlar diqqətlərini ABŞ-da açıqlanacaq inflyasiya göstəricilərinə yönəldiblər. Həmin məlumatların gələn həftə keçiriləcək Federal Ehtiyat Sisteminin (FED) iclasında faiz dərəcələri ilə bağlı qərara təsir göstərəcəyi gözlənilir.
Analitiklərin fikrincə, ABŞ dövlət istiqrazlarının gəlirliliyinin yüksəlməsi və Yaxın Şərqdə yenidən artan geosiyasi gərginlik qiymətli metal üçün qısamüddətli təzyiq yaradan əsas amillər olaraq qalır. Bununla yanaşı, ABŞ dollarının zəifləməsi və qızıla uzunmüddətli investisiya marağı bazarı dəstəkləməyə davam edir.
Ticarət məlumatlarına əsasən, Bakı vaxtı ilə saat 04:43-ə olan vəziyyətə görə, spot qızılın (XAU/USD) qiyməti 0,1 faiz azalaraq bir unsiya üçün 4 398,53 dollar olub. Qızıl fyuçersləri isə 0,4 faiz ucuzlaşaraq 4 442,00 dollara enib.
Digər qiymətli metallar arasında gümüşün (XAG/USD) qiyməti demək olar ki, dəyişməyərək bir unsiya üçün 67,28 dollar təşkil edib. Platin (XPT/USD) isə 0,6 faiz ucuzlaşaraq 1 888,23 dollara düşüb. ABŞ dollarının indeksi isə 98,81 bənd səviyyəsində sabit qalıb.
Bazar iştirakçıları hazırda ABŞ-da istehsalçı və istehlak qiymətləri indekslərinin nəticələrini diqqətlə izləyirlər. Bu göstəricilər FED-in pul-kredit siyasəti ilə bağlı növbəti addımları barədə gözləntilərin formalaşmasında əsas rol oynayacaq.
MONETAR.AZ
