Niderlandın ASML şirkəti 670,3 milyard dollarlıq bazar dəyəri ilə Avropanın ən dəyərli birja şirkəti olub. Şirkət bu göstərici ilə ikinci yerdəki “HSBC”ni demək olar ki, iki dəfə üstələyib.
Monetar.az -ın “StockAnalysis.com” və Avropa birjalarının məlumatları əsasında hazırladığı reytinqdə 42 Avropa ölkəsində ən yüksək bazar dəyərinə malik şirkətlər müqayisə edilib.
Reytinqdə Böyük Britaniyanın “HSBC” bankı 342,4 milyard dollarla ikinci, İsveçrənin “Roche” şirkəti 341,5 milyard dollarla üçüncü yerdə qərarlaşıb. Almaniyanın “Siemens” şirkətinin bazar dəyəri 246,3 milyard, Fransanın “L'Oréal” şirkətinin 230,2 milyard dollar təşkil edib.
İspaniyada ən böyük şirkət 205,1 milyard dollarlıq bazar dəyəri ilə “Banco Santander”, Danimarkada 168,6 milyard dollarla “Novo Nordisk”, İrlandiyada 168,3 milyard dollarla “Eaton”, Belçikada 146,4 milyard dollarla “AB InBev” olub.
İtaliyada “UniCredit” 142,6 milyard dollarla, İsveçdə “Investor AB” 124,4 milyard dollarla, Norveçdə isə “Equinor” 100,7 milyard dollarla ölkələrinin ən dəyərli şirkətləri sırasındadır.
Sektorlar üzrə maliyyə şirkətləri Avropada üstünlük təşkil edir. Banklar 15 ölkədə, sığorta və investisiya şirkətləri də nəzərə alındıqda maliyyə sektoru ümumilikdə 18 ölkədə ən dəyərli şirkətə sahibdir. Enerji və kommunal xidmət şirkətləri isə 10 ölkədə birinci yerdədir.
Beləliklə, maliyyə və enerji sektorları birlikdə 42 ölkədən 28-də ən yüksək bazar dəyərinə malik şirkətləri formalaşdırır.
ASML isə reytinqdə texnologiya sektorunu təmsil edən yeganə şirkətdir. Şirkət qabaqcıl çiplərin istehsalında istifadə olunan ekstremal ultrabənövşəyi litoqrafiya sistemlərinin əsas təchizatçısıdır.
