Geely rəhbərliyi çərşənbə axşamı keçirilən Citi China Conference konfransında şirkətin ixracın genişləndirilməsi və mənfəətliliyin artırılması strategiyasını açıqlayıb.
Avtomobil istehsalçısının məlumatına görə, 2026-cı ilin yanvar-sentyabr aylarında bir avtomobil üzrə baza xalis mənfəət təxminən 6 700 yuan təşkil edib. Bu göstərici 2025-ci ildə 4 800 yuan səviyyəsində olub.
Şirkət mənfəət artımını ixracın genişlənməsi və satış portfelində daha bahalı modellərin payının yüksəlməsi ilə izah edir. Məsələn, Zeekr 9X modelinin orta satış qiyməti təxminən 500 000 yuan, bir avtomobildən əldə olunan mənfəət isə 80 000–100 000 yuan arasındadır.
Geely 2026-cı ilin yekununda ixrac həcminin 1 milyon avtomobili keçəcəyini gözləyir. Rəhbərlik noyabr və dekabr aylarında da xarici bazarlara tədarükün yüksək templə davam edəcəyini bildirib. Şirkətin daha uzunmüddətli planına əsasən, 2028-ci ilədək ümumi ixracı 2 milyon avtomobilə çatdırmaq, bunun 600 000-ni Avropaya göndərmək nəzərdə tutulur.
Böyük Britaniya istisna olmaqla, Qərbi Avropa bazarları üçün 2026-cı ildə 150 000–200 000 avtomobil ixracı proqnozlaşdırılır. Tədarüklərin batareyalı elektromobillər və qoşulan hibridlər arasında bərabər bölünməsi planlaşdırılır. Şirkət hibrid modellər üzrə kvotaları əsasən Zeekr 9X və 8X kimi daha yüksək mənfəət marjasına malik avtomobillərə ayıracaq.
Avropada istehsal imkanlarının genişləndirilməsi də Geely-nin strategiyasının mühüm istiqamətlərindəndir. Şirkət Ford-un İspaniyanın Valensiya şəhərində yerləşən zavodunda istehsal gücünün bir hissəsini əldə edəcək. Ümumi illik gücü 500 000 avtomobil olan müəssisədə Geely üçün ayrılacaq istehsal sahəsində seriyalı istehsalın 2027-ci ilin ikinci yarısında başlanması, 2028-ci ildə isə tam gücə çatması planlaşdırılır.
Bundan başqa, Geely Volvo-nun Belçikanın Gent şəhərindəki zavodundan istifadə imkanlarını müzakirə edir. Şirkət bu müəssisədə illik 200 000 avtomobil istehsal etməyi nəzərdən keçirir. Rəhbərlik zavodun Lynk & Co və Zeekr modelləri ilə eyni arxitekturadan istifadə etməsinin mövcud işçi qüvvəsi və təchizat zəncirindən yararlanmaqla istehsalın genişləndirilməsini asanlaşdıracağını vurğulayıb.
MONETAR.AZ