Avropanın energetika şirkətlərinin səhmləri fevralın sonunda İran münaqişəsinin başlanmasından sonra fərqli dinamika nümayiş etdirir. İnvestorlar əsasən neft və qaz qiymətlərinin yüksəlməsindən birbaşa faydalanan şirkətlərə üstünlük versələr də, "Jefferies" investisiya bankının analitikləri hesab edirlər ki, bir sıra iri enerji şirkətlərinin səhmləri hələ də fundamental göstəricilərinə uyğun qiymətləndirilmir və cəlbedici investisiya imkanları yaradır.
Bankın təhlilinə görə, sektorda mənfəət perspektivlərinin yaxşılaşması hesabına sürətlə bahalaşan şirkətlərlə, geosiyasi hadisələrdən əməliyyat baxımından məhdud təsirlənməsinə baxmayaraq bazarda "həddindən artıq satılmış" hesab edilən şirkətlər arasında ciddi qiymət fərqi formalaşıb.
İnteqrasiya olunmuş neft şirkətləri arasında "Neste Oyj" dizel yanacağının bahalaşması və bərpa olunan yanacaq bazarında əlverişli tənzimləmə fonunda diqqət çəkir. Şirkətin səhmləri münaqişənin başlanmasından bəri 33% bahalaşıb. "Repsol" səhmləri 17%, "Equinor ASA" isə Avropada qaz qiymətlərinin yüksəlməsi və daha aydın strateji istiqamət hesabına 13% artım nümayiş etdirib.
Bununla yanaşı, "Jefferies" hesab edir ki, bəzi iri enerji şirkətləri güclü maliyyə göstəricilərinə baxmayaraq bazar tərəfindən lazımi səviyyədə qiymətləndirilməyib.
Bank "Shell PLC"-ni ən cəlbedici "həddindən artıq satılmış" şirkətlərdən biri hesab edir. Analitiklərin fikrincə, "ARC Resources" aktivlərinin alınması şirkətin resurs bazasını gücləndirir, Kanadadakı mayeləşdirilmiş təbii qaz (LNG) layihəsi üzrə yekun investisiya qərarının verilməsi isə uzunmüddətli inkişaf perspektivlərini yaxşılaşdırır.
"TotalEnergies SE" də analitiklər tərəfindən cəlbedici qiymətləndirilir. Bildirilir ki, şirkətin şaxələndirilmiş aktiv portfeli Yaxın Şərqdəki geosiyasi risklərin təsirini yumşaldır. "Ithaca Energy PLC" isə birləşmə və satınalmalar üzrə daha çevik mövqeyə malik şirkətlər sırasında göstərilir.
Geoloji kəşfiyyat və hasilat (E&P) sektorunda "Vår Energi" səhmləri əlavə dividend gözləntiləri və hasilatın artımı hesabına 15%, "Tullow Oil" isə yenidən maliyyələşmənin uğurla başa çatdırılması fonunda 11% bahalaşıb. Bununla belə, "Jefferies" hesab edir ki, "Serica Energy", "Harbour Energy" və "Kosmos Energy" güclənən maliyyə göstəricilərinə, yaxşılaşan likvidliyə və strateji layihələrdə irəliləyişə baxmayaraq bazarda hələ də lazımi qiymətləndirilməyib.
Analitiklər neft-servis sektorunda da maraqlı imkanlar görürlər. Onların fikrincə, "Maire", "Technip Energies", "GTT" və "TechnipFMC" şirkətləri Yaxın Şərqdəki gərginlikdən birbaşa ciddi təsirlənməsələr də, sabit sifariş portfellərinə baxmayaraq bazardan geri qalırlar. Münaqişənin səngiməsi və regionda bərpa layihələrinin sürətlənməsi bu şirkətlər üçün əlavə gəlir imkanları yarada bilər.
"Jefferies" hesab edir ki, Avropa energetika sektorunda qiymət fərqlərinin dərinləşməsi investorlar üçün seçici yanaşma ilə cəlbedici alış imkanları formalaşdırır. Bankın fikrincə, geosiyasi risklər fonunda bəzi şirkətlər yüksək qiymətləndirilsə də, bir sıra fundamental cəhətdən güclü enerji şirkətləri hələ də bazarda real dəyərindən aşağı qiymətlə ticarət olunur.
