Braziliya hökuməti xam neft ixracına tətbiq edilən 12%-lik ixrac rüsumunun qüvvədə olma müddətini daha 60 gün uzadıb. Sözügedən vergi ilk dəfə mart ayında, Yaxın Şərqdəki geosiyasi gərginlik fonunda neft qiymətlərinin kəskin bahalaşdığı dövrdə tətbiq edilmişdi.
Qərar Braziliyanın Xarici Ticarət Palatasının (Camex) İcraiyyə Komitəsi (Gecex) tərəfindən qəbul edilib. Komitə bildirib ki, tətbiq olunan tədbirə 30 gündən sonra yenidən baxılacaq.
Bundan əvvəl hökumət rəsmiləri beynəlxalq bazarlarda neftin ucuzlaşması fonunda ixrac rüsumunun azaldılması və ya tamamilə ləğvi variantlarını müzakirə etsələr də, hazırkı mərhələdə mövcud mexanizmin dəyişdirilməməsinə qərar verilib.
Gecex vurğulayıb ki, sözügedən tədbir müvəqqəti xarakter daşıyır və onun davam etdirilməsi beynəlxalq bazarlardakı vəziyyət, eləcə də neft və yanacaq qiymətlərinə təsir edən amillər nəzərə alınmaqla qərara alınıb.
Dünən "Brent" markalı neftin fyuçersləri təxminən 76 ABŞ dolları/barrel səviyyəsində ticarət olunub. Bir gün əvvəl qiymətlər Yaxın Şərqdə gərginliyin artması səbəbindən son həftələrin ən yüksək səviyyəsinə yüksəlsə də, bu göstərici hələ də fevralın sonunda qeydə alınmış 118 ABŞ dollarından yuxarı pik qiymətlərdən əhəmiyyətli dərəcədə aşağıdır.
Prezident Luis İnasio Lula da Silva administrasiyası bildirib ki, ixrac rüsumundan əldə olunan gəlirlər müharibənin yaratdığı inflyasiya təzyiqlərini azaltmaq və istehlakçıların müdafiəsinə yönəlmiş tədbirlərin maliyyələşdirilməsində istifadə olunacaq.
Hökumət daha əvvəl dizel yanacağı, benzin, aviasiya yanacağı və məişətdə istifadə olunan mayeləşdirilmiş neft qazı (LPG) üzrə subsidiyalar tətbiq etmişdi. Ötən həftə isə beynəlxalq neft qiymətlərinin enməsi fonunda həmin subsidiyaların mərhələli şəkildə ləğvinə başlanıldığı açıqlanmışdı.
Bununla belə, maliyyə naziri Dario Durigan dünən bildirib ki, benzin subsidiyasının ləğvi ilə bağlı qərarın qəbulu gələn həftəyədək təxirə salınıb. Bu addım hökumətə daxili yanacaq bazarındakı vəziyyəti və qlobal enerji qiymətlərinin dinamikasını əlavə qiymətləndirmək imkanı verəcək.
