Birləşmiş Ərəb Əmirlikləri (BƏƏ) Fars körfəzində baş verən neft sızmasından sonra ətraf mühitə dəyən zərər və mümkün sağlamlıq riskləri ilə bağlı narahatlıqlar fonunda bir neçə şimal əmirliyində çimərliklərin bağlanması barədə qərar qəbul edib.
Şarja hakimiyyəti çirklənmənin yayılmasının qarşısını almaq məqsədilə Əl-Hamriyə çimərliyini bağlayıb. Rəs əl-Xeymə əmirliyində isə ayrıca qərar verilənədək bütün çimərliklərin bağlı qalacağı elan edilib.
Məhdudiyyətlər cümə günü Dubaydan şimalda yerləşən Ümm əl-Qeyveyn sahili yaxınlığında neft sızmasının aşkarlanmasından sonra tətbiq edilib. BƏƏ-nin İqlim Dəyişikliyi və Ətraf Mühit Nazirliyi hadisədən dərhal sonra Ümm əl-Qeyveyndəki bütün çimərliklərin və sahil zonalarının müvəqqəti bağlanması barədə sərəncam verib.
Hakimiyyət orqanları insidentə səbəb olan tankerin adını açıqlamayıblar. Nazirlikdən bildirilib ki, Ümm əl-Qeyveyn, Şarja və Əcmanda hiss edilən qeyri-adi qoxular sakinlərin sağlamlığı üçün təhlükə yaratmır.
Şarjada çirkləndirici maddələrin çimərliklərə çatmasının qarşısını almaq və mühafizə tədbirlərini gücləndirmək üçün xüsusi cavab qrupları fəaliyyətə başlayıb.
Son hadisə son aylarda Fars körfəzi regionunda qeydə alınan digər dəniz çirklənməsi halları fonunda baş verib.
Avqust ayında Omanın cənub-şərq sahilləri yaxınlığında bir tanker dənizdə saya oturub. Hadisə nəticəsində Manhettenin ərazisindən təxminən 6,5 dəfə böyük sahəni əhatə edən neft sızması baş verib.
Daha sonra İranın Keşm adası yaxınlığında da neft sızması qeydə alınıb. Sızma nəsli kəsilmək təhlükəsi altında olan bissa dəniz tısbağalarının məskunlaşdığı ərazilərin yaxınlığında baş verib.
Regional münaqişənin davam etməsi dəniz mühitinin çirklənməsi ilə bağlı narahatlıqları daha da artırır. Xüsusilə strateji əhəmiyyət daşıyan Hörmüz boğazında gəmiçiliyin təhlükəsizliyi və mümkün ekoloji fəsadlar diqqət mərkəzindədir.
Bu ayın əvvəlində Sinqapur Dəniz və Liman İdarəsinin məlumatına görə, hücum nəticəsində yanğın baş verən yük gəmilərindən biri Hörmüz boğazında batıb.
Digər kommersiya gəmilərinin də hücumlara məruz qalması yanacaq sızması və ətraf mühitə zərər vurulması riskini artırır. Bu təhlükələr əsas neft anbarları zədələnməsə belə, regionun dəniz ekosistemi üçün ciddi nəticələr yarada bilər.
Hörmüz boğazı qlobal enerji təchizatının əsas marşrutlarından biri olaraq qalır. Buna görə də regionda davam edən gərginlik fonunda həm gəmiçiliyin təhlükəsizliyinin təmin edilməsi, həm də dəniz mühitinin qorunması xüsusi əhəmiyyət daşıyır.
MONETAR.AZ
