Azərbaycanda dağ-mədən və metallurgiya sənayesinin inkişafı ilə bağlı yeni Dövlət Proqramı təsdiqlənib. Prezident İlham Əliyev bununla bağlı Sərəncam imzalayıb.
“Azərbaycan Respublikasında dağ-mədən (metal filizləri) və metallurgiya sənayesinin inkişafına dair 2027–2030-cu illər üçün Dövlət Proqramı” bu istiqamətdə növbəti 4 il üçün əsas prioritetləri müəyyən edəcək. Sənəd çərçivəsində metal filizlərinin hasilatı və emalı, eləcə də metallurgiya sənayesinin inkişafına yönəlmiş tədbirlərin həyata keçirilməsi nəzərdə tutulur.
Sərəncama əsasən, Dövlət Proqramında nəzərdə tutulan tədbirlərin əlaqələndirilməsi və icrasına nəzarət Nazirlər Kabinetinə həvalə edilib. Nazirlər Kabineti proqramın icra vəziyyəti barədə ildə bir dəfə Azərbaycan Prezidentinə məlumat verməlidir. Sərəncamdan irəli gələn digər məsələlərin həlli də Nazirlər Kabinetinin səlahiyyətinə aid edilib.
Dövlət Proqramında nəzərdə tutulan tədbirlərin monitorinqi və qiymətləndirilməsi isə Nazirlər Kabinetinin sifarişi əsasında İqtisadi İslahatların Təhlili və Kommunikasiya Mərkəzi tərəfindən aparılacaq. Bununla proqram üzrə görülən işlərin nəticələrinin mütəmadi şəkildə qiymətləndirilməsi nəzərdə tutulur. Monitorinq mexanizmi tədbirlərin icra vəziyyətinin izlənməsinə imkan verəcək.
Proqramın maliyyələşdirilməsi ilə bağlı məsələlər də sənəddə öz əksini tapıb. Maliyyə Nazirliyi və İqtisadiyyat Nazirliyi hər il dövlət büdcəsinin və dövlət investisiya proqramlarının hazırlanması zamanı Dövlət Proqramında nəzərdə tutulan tədbirlər üçün zəruri vəsaitin ayrılmasını nəzərə almalıdır. Bunun üçün aidiyyəti qurumların müvafiq tədbirlər görməsi tapşırılıb.
Yeni Dövlət Proqramının 2027–2030-cu illəri əhatə etməsi dağ-mədən və metallurgiya sahəsinin inkişafının orta müddətli dövlət siyasətinin əsas istiqamətlərindən biri kimi müəyyənləşdirildiyini göstərir. Proqramın icrası çərçivəsində görüləcək tədbirlərin nəticələri qarşıdakı illərdə bu sahənin inkişaf dinamikasında özünü göstərəcək. İcra prosesinin maliyyələşdirilməsi və monitorinqinin ayrıca müəyyənləşdirilməsi isə proqram üzrə nəzərdə tutulan tədbirlərin həyata keçirilməsinə nəzarətin təmin olunmasına xidmət edir.
MONETAR.AZ
