Almaniya Bundesbankının qiymətləndirməsinə görə, ölkə iqtisadiyyatı 2026-cı ilin ikinci rübündə Yaxın Şərqdəki müharibənin yaratdığı çətinliklərə baxmayaraq, mülayim artım göstərib.
Avropanın ən böyük, dünyanın isə üçüncü ən böyük iqtisadiyyatı uzun müddət zəif artım dinamikası nümayiş etdirib. Dövlət xərclərinin artması hesabına investisiya fəallığının güclənməsi fonunda 2026-cı ildə iqtisadi artımın sürətlənəcəyi gözlənilsə də, enerji daşıyıcıları və xammal qiymətlərinin yüksəlməsi bu dinamikanı zəiflədib.
Reuters sorğusunda iştirak edən iqtisadçıların proqnozlarına əsasən, iyun ayında başa çatan üç ay ərzində Almaniya iqtisadiyyatının rüblük ifadədə cəmi 0,1% artacağı gözlənilir. Bundesbank bildirib ki, sənaye sektoru xarici tələbatın canlanmasından və ixracın artımından faydalanıb.
“İstehlakçılar enerji daşıyıcılarının yüksək qiymətlərinə və bununla bağlı alıcılıq qabiliyyətinin azalmasına nisbətən davamlı yanaşıblar ki, bu da istehlak xərclərinin ən azı sabit qalmasına imkan verib”, — deyə mərkəzi bank qeyd edib.
Bundesbankın fikrincə, Almaniya iqtisadiyyatı müəyyən dərəcədə müvəqqəti amillərdən də dəstək alıb. Xammal və aralıq məhsulların çatışmazlığı Asiyanın bəzi əsas rəqib ölkələrinə daha ciddi təsir göstərib. Eyni zamanda, gələcək tədarük problemləri ilə bağlı narahatlıqlar şirkətləri əvvəlcədən ehtiyat toplamağa sövq etmiş ola bilər.
Mərkəzi bank hesab edir ki, Yaxın Şərqdə vəziyyət daha da gərginləşməzsə, müharibənin iqtisadiyyata mənfi təsiri üçüncü rübdə ikinci rüblə müqayisədə daha zəif hiss oluna bilər.
Bununla belə, Bundesbank xəbərdarlıq edib ki, müvəqqəti dəstək amilləri tədricən aradan qalxacaq, müharibənin yaratdığı qeyri-müəyyənlik isə iqtisadi fəallığa təzyiq göstərməkdə davam edəcək.
Bank iyun ayında 2026-cı il üçün Almaniya iqtisadiyyatının illik artımını 0,5%, 2027-ci il üçün isə 0,8% səviyyəsində proqnozlaşdırıb. Avropa Komissiyası və Beynəlxalq Valyuta Fondunun (BVF) 2026-cı il üzrə gözləntiləri isə bir qədər yüksəkdir.
Bundesbank əlavə edib ki, qarşıdakı aylarda inflyasiyanın sürətlənməsi mümkündür. Xüsusilə enerji qiymətlərinin artmasının dolayı təsirlərinin zamanla daha aydın hiss olunacağı gözlənilir.
MONETAR.AZ
