“Moody’s Ratings” agentliyi Hindistan iqtisadiyyatının artımı ilə bağlı proqnozunu yüksəldib. Agentlik qlobal iqtisadi təlatümlərə baxmayaraq istehlak tələbatının güclənməsini, infrastruktura yatırılan investisiyaları və xidmət sektorunda aktivliyin sabit qalmasını nəzərə alaraq ölkənin 2026–2027-ci maliyyə ili üzrə iqtisadi artım proqnozunu 6 faizdən 7 faizə çatdırıb.
Agentliyin Hindistanın suveren reytinqinə dair dərc etdiyi dövri icmalda bildirilir ki, 2026-cı təqvim ilinin ilk yarısında ölkənin real ümumi daxili məhsulu (ÜDM) illik ifadədə 8,2 faiz artıb. Bu göstərici 2025-ci ildə qeydə alınan 7,3 faizlik artımdan yüksəkdir.
“Moody’s” Hindistan iqtisadiyyatının Yaxın Şərqdə davam edən münaqişənin yaratdığı qlobal iqtisadi dalğalanmalara qarşı dayanıqlılıq nümayiş etdirdiyini qeyd edib. Agentliyin qiymətləndirməsinə görə, Hindistanın iqtisadi artım tempinin G20 ölkələri və analoji suveren reytinqə malik digər inkişaf etməkdə olan dövlətlərin göstəricilərini üstələməsi gözlənilir.
Agentlik bununla yanaşı, Hindistanın uzunmüddətli emitent reytinqini sabit proqnozla “Baa3” səviyyəsində saxlayıb. Reytinq ölkənin iri, şaxələndirilmiş və yüksək artım potensialına malik iqtisadiyyatı ilə yüksək dövlət borcu, zəif borc dayanıqlılığı və adambaşına düşən gəlirin nisbətən aşağı olması arasındakı balansı əks etdirir.
Bununla belə, “Moody’s” Yaxın Şərqdə münaqişənin uzanmasının enerji daşıyıcılarının qiymətlərini yüksək səviyyədə saxlaması riskinə diqqət çəkib. Agentlik hesab edir ki, bu amil Hindistanda inflyasiyanın 2026–2027-ci maliyyə ili üçün proqnozlaşdırılan 4,8 faizdən yuxarı yüksəlməsinə səbəb ola bilər.
Enerji daşıyıcıları və gübrələrin idxal xərclərinin artması isə ölkənin cari əməliyyatlar kəsirinin genişlənməsi riskini artırır. Bu, həmçinin Hindistanın xarici ticarət və makroiqtisadi göstəricilərinə əlavə təzyiq yarada bilər.
Fiskal siyasət baxımından agentlik qeyd edib ki, Hindistan hökuməti 2026–2027-ci maliyyə ilində federal büdcə kəsirini əvvəlki ildəki 4,4 faizdən ÜDM-in 4,3 faizi səviyyəsinə endirməyi hədəfləyir. Lakin müdafiə və infrastruktur xərclərinin artırılması büdcə konsolidasiyasının tempini məhdudlaşdıra bilər.
MONETAR.AZ
