UBS analitiklərinin qiymətləndirməsinə görə, Federal Ehtiyat Sisteminin (FED) sədri Kevin Uorşun son açıqlamaları və ABŞ-da gözləniləndən güclü məşğulluq göstəriciləri fonunda tənzimləyicinin 2026-cı ilin sonunadək uçot dərəcəsini iki dəfə artırması ehtimalı yüksəlib.
Conatan Pinq, Ebiqeyl Uott və digər analitiklər bildiriblər ki, Kevin Uorşun Cekson-Houlda keçirilən FED simpoziumundakı çıxışı pul-kredit siyasətinin daha da sərtləşdirilməsinə meylli mövqeyə işarə edir.
Uorş çıxışında vurğulayıb ki, FED rəsmiləri baza inflyasiyasının tənzimləyicinin 2%-lik hədəfinə "aydın və kifayət qədər sürətlə" yaxınlaşdığına əmin olmalıdırlar. Əks halda, onun sözlərinə görə, əlavə tədbirlərə ehtiyac yaranacaq. O, həmçinin faiz dərəcələrinin pul-kredit siyasətinin əsas aləti olaraq qaldığını qeyd edib.
"Uorş kifayət qədər sərt mesaj verdi. İndi onun nüfuzu da bu mövqedən asılı olduğuna görə, biz onun bunu real addımlarla dəstəkləməyə çalışacağını gözləyirik", – deyə UBS analitikləri bildiriblər.
Bununla belə, analitiklər vurğulayırlar ki, sentyabr və dekabr iclaslarında hər biri 25 baza bəndi olmaqla iki faiz artımı barədə proqnoz hələ yüksək əminliklə qiymətləndirilmir və gələcək makroiqtisadi göstəricilərdən asılı olacaq. Onların fikrincə, bu həftə açıqlanacaq avqust ayı üzrə ABŞ İstehlak Qiymətləri İndeksi (CPI) gözlənilməz dərəcədə zəif olarsa, bu ssenari qüvvədən düşə bilər.
Hazırda maliyyə bazarları FED-in sentyabr iclasında uçot dərəcəsini 25 baza bəndi artırması ehtimalını təxminən 60% səviyyəsində qiymətləndirir. Ötən həftə açıqlanan məşğulluq statistikası ABŞ iqtisadiyyatının avqust ayında gözləniləndən daha çox yeni iş yeri yaratdığını göstərərək bu gözləntiləri gücləndirib. Analitiklər hesab edirlər ki, yüksək faiz dərəcələri gələcəkdə əmək bazarını zəiflədə bilsə də, hazırkı dayanıqlı məşğulluq göstəriciləri əlavə monetar sərtləşdirmə üçün əsas arqumentlərdən biri olaraq qalır.
UBS qeyd edir ki, sentyabr iclası ilə bağlı qərar hələ də kifayət qədər mürəkkəbdir. Bankın fikrincə, Kevin Uorş yekun qərar verərkən təkcə inflyasiya və məşğulluq göstəricilərini deyil, həm də bazar gözləntilərini, iclaslararası dövrdə maliyyə şərtlərinin dəyişməsini və FED rəhbərliyinin digər üzvlərinin mövqeyini də nəzərə alacaq.
MONETAR.AZ
