Avropanın avtomobil və avtomobil ehtiyat hissələri sektorunda istehsal həcmləri 2026-cı ilin oktyabrında 2021-ci ilin iyun ayından bəri ən kəskin artımını göstərib.
S&P Global tərəfindən dərc olunan “Europe Sector PMI” indeksinin məlumatlarına görə, avtomobil sənayesi istehsal artımının sürətinə görə Avropa sektorları arasında ikinci pilləyə yüksəlib. Reytinq Avropanın 12 ölkəsində fəaliyyət göstərən 8 mindən çox özəl sektor şirkəti arasında keçirilən sorğunun nəticələri əsasında hazırlanıb.
Oktyabr ayında fəallığın artımına görə ilk yeri proqram təminatı və xidmətlər sektoru tutub. Texnoloji avadanlıqlar sektoru isə üçüncü sıraya geriləyib. Bu üç sahə artıq ardıcıl doqquz aydır ki, reytinqin liderləri sırasında yer alır.
Hesabat dövründə monitorinq aparılan 19 sektorun 13-də istehsal həcmləri artıb. Sentyabrda isə artım 16 sektoru əhatə etmişdi. Qeyd edək ki, sentyabr göstəricisi 2023-cü ilin martından bəri ən genişmiqyaslı artım kimi qeydə alınmışdı.
Texnologiya sahələri ardıcıl doqquzuncu ay ən sürətlə böyüyən iri sektorlar qrupu statusunu qoruyub. Bu tendensiya fevral ayından etibarən davam edir.
İstehsal həcmlərində ən kəskin azalma meşə və kağız məhsulları, ev və şəxsi istifadə malları, eləcə də daşınmaz əmlak sektorlarında müşahidə olunub.
İstehlak malları son dövrdə geriləmə qeydə alınan yeganə iri sektorlar qrupu olub. Bu, həmin qrupun texnologiya sektorundan sonra ikinci yerdə qərarlaşdığı aprel ayı ilə müqayisədə mənzərənin dəyişdiyini göstərir.
Oktyabrda istehsal sahələri xidmət sektorları ilə müqayisədə xərclərin artımından daha çox təsirlənib. Məsrəflərin ən sürətli yüksəlişi maşınqayırma və avadanlıqlar, həmçinin texnoloji avadanlıqlar sektorlarında qeydə alınıb. Bu sahələrdə artım templəri 2026-cı ilin ən yüksək göstəricilərinə çatıb və ya həmin səviyyələrə yaxın olub.
Nəqliyyat sektoru isə xammal və materialların qiymət artımının sürətinə görə bütün sahələr arasında üçüncü yerdə qərarlaşıb.
Məşğulluq göstəricilərində də sektorlar üzrə fərqli dinamika müşahidə olunub. Texnoloji avadanlıqlar sektoru yeni iş yerlərinin yaradılması baxımından bütün sahələr arasında ən yüksək tempi göstərib. Proqram təminatı və xidmətlər sektoru isə fəallıq reytinqinin ilk altılığında sentyabrla müqayisədə məşğulluğun azaldığı yeganə sahə olub.
MONETAR.AZ
