AvtoVAZ yenilənmiş təchizata malik Lada Aura avtomobillərinin istehsalına başlanıldığını elan edib. Stretç-sedan modeli artıq birzonalı iqlim-kontrol sistemi və telematika sistemi ilə təchiz olunur. Bu funksiyalar baza komplektasiyası da daxil olmaqla modelin bütün versiyalarında təqdim edilir. İyulun əvvəlində analoji yeniliklər Lada Vesta modelində də tətbiq edilmişdi.
Birzonalı iqlim-kontrol sistemi salon daxilində müəyyən edilmiş temperaturu avtomatik rejimdə sabit saxlayır. Telematika sistemi isə mobil tətbiq vasitəsilə avtomobilin yerləşdiyi məkan, yanacaq səviyyəsi, mühərrikin temperaturu, akkumulyatorun enerji səviyyəsi və digər göstəricilər barədə məsafədən məlumat əldə etməyə imkan verir.
“Lada Aura”nın baza komplektasiyasına dörd təhlükəsizlik yastığı, elektron sabitləşdirmə sistemi (ESP), kruiz-kontrol, bütün oturacaqların və sükan çarxının qızdırılması, mühərrikin məsafədən işə salınması funksiyasına malik açarsız giriş sistemi, həmçinin 7 düymlük ekranla təchiz olunmuş multimedia sistemi daxildir.
Modelin ən yüksək komplektasiyasında iki rəngli rəqəmsal cihazlar paneli, qara və ya açıq-boz rəngli təbii dəri salon üzlüyü, eləcə də 10 düymlük ekranla təchiz edilmiş multimedia sistemi təqdim olunur.
Şirkət hələlik yenilənmiş versiyaların satışa çıxarılma tarixini və qiymətlərini açıqlamayıb.
MONETAR.AZ
