Hindistan təxminən altı il ərzində ilk dəfə Venesueladan ən böyük həcmdə neft idxal etməyə hazırlaşır. Bu addım dünyada xam neftin üçüncü ən böyük idxalçısına Yaxın Şərqdən olan və İranda baş verən müharibə səbəbilə tədarükü pozulan neft növlərini əvəz etməyə imkan verəcək. Bu barədə Bloomberg məlumat yayıb.
Kplerin məlumatına görə, bu ay Cənubi Amerika istehsalçısından Hindistanın qərb sahilinə 12 milyon barreldən çox neft göndərilir ki, bu da 2020-ci ilin fevralından bəri ən yüksək göstəricidir. Apreldə çatacaq yüklərin isə Yaxın Şərqdən tədarükdə son pozuntulardan əvvəl müqavilələşdirildiyi ehtimal olunur. Bu isə ani reaksiya deyil, daha çox uzunmüddətli strateji dəyişimi göstərir, araşdırma şirkətinin baş analitiki Sumit Ritoliya bildirib.
Cənubi Asiya ölkəsi istehlak etdiyi xam neftin təxminən 90%-ni idxal edir və İranda müharibə nəticəsində Hörmüz boğazı vasitəsilə daşımaların pozulmasından sonra alternativ mənbələr axtarır. Venesuela oxşar kükürdlü neft növləri istehsal edir və Hindistan əvvəllər ABŞ sanksiyaları səbəbilə məhdudlaşdırılana qədər bu ölkədən böyük həcmdə neft alırdı.
Suezmax sinifli “Ottoman Sincerity” tankeri (təxminən 1 milyon barrel Boscan markalı neft daşıyır; yükləmə Aruba adası yaxınlığında gəmidən-gəmiyə ötürmə yolu ilə həyata keçirilib) artıq Reliance Industries Ltd-nin Sikka limanına çatıb.
ABŞ-dan birbaşa PDVSA-dan alış üçün lisenziyaya malik olan Reliance bu həftə dövlət şirkətindən ilk partiyanı Baham bayraqlı “Helios” supertankeri ilə də yükləyib və əvvəlki Vitol Group və Trafigura vasitəsilə satınalma praktikasından imtina edib.
MONETAR.AZ
