Dünyada nüvə enerjisi sahəsində ən çox güc yaradan ölkələrin reytinqi açıqlanıb və yaxın illərdə bu sahədə liderliyin dəyişəcəyi gözlənilir.
Global Energy Monitorun məlumatlarına əsasən, mövcud və planlaşdırılan layihələr nəzərə alındıqda Çin nüvə enerjisi istehsalında dünyada əsas liderə çevrilmək üzrədir.
Hazırda ABŞ 102,5 giqavat güc ilə birinci yerdə olsa da, planlaşdırılan layihələrlə birlikdə Çin ümumi gücünü 185,8 giqavata çatdıraraq bu ölkəni xeyli qabaqlayacaq.
Məlumata görə, Çin hazırda 60,9 giqavat işlək gücə malikdir və əlavə 124,9 giqavatlıq layihə üzərində çalışır.
Reytinqdə ikinci yerdə qərarlaşacaq ABŞ-ın isə ümumi potensial gücünün 117,9 giqavat olacağı gözlənilir. Fransa isə 75,6 giqavatla üçüncü yerdə qərarlaşacaq.
Digər əsas ölkələr arasında Rusiya (60,7 giqavat), Hindistan (39,7 giqavat) və Cənubi Koreya (32,7 giqavat) yer alır.
Qeyd olunur ki, bəzi ölkələr nüvə enerjisini sıfırdan inkişaf etdirməyə başlayır. Bu baxımdan Uqanda 18 giqavatlıq planlaşdırılan güc ilə diqqət çəkir.
Ekspertlər bildirirlər ki, nüvə enerjisinə marağın artması artan elektrik tələbatı və aşağı karbonlu enerji mənbələrinə keçidlə bağlıdır. Bu sahədə investisiyalar ölkələrin enerji təhlükəsizliyini gücləndirməyə və idxaldan asılılığı azaltmağa imkan verir.
Hazırda dünyada nüvə enerjisi əsasən parçalanma (fission) texnologiyasına əsaslanır və qlobal elektrik istehsalının təxminən 10 faizini təmin edir. Eyni zamanda, daha kiçik və modul reaktorların inkişafı bu sahədə yeni mərhələnin başlanğıcı kimi qiymətləndirilir.
Bununla yanaşı, birləşmə (fusion) texnologiyası uzunmüddətli perspektiv kimi qalır və hələ kommersiya istifadəsinə tam hazır deyil.
MONETAR.AZ
