Yeni texnologiya avtomobillərə yolda buz və donmuş yağışı aşkar etməyə kömək edəcək. Miçiqan Universitetinin tədqiqatçıları qış yollarını xeyli daha təhlükəsiz etməyə imkan verən unikal bir texnologiya təqdim ediblər.
Bu texnologiya yer şəraitindən deyil, gələcək Mars missiyalarının tapşırıqlarından ilhamlanıb. Mars torpağında su və buzu aşkar etmə üsulları üzərində çalışan iqlimologiya və kosmik elmlər professoru Nilton Renno bu texnologiyaların Yer üzündə də tətbiq oluna biləcəyini müəyyən edib.
Sistem iki kompakt datçikdən ibarətdir. Birincisi, mikrodalğalı datçik avtomobilin səthinə bərkidilir və onun su və ya buzla örtülüb-örtülmədiyini dərhal müəyyən edir.
İkinci, daha mürəkkəb infraqırmızı lazer datçiki isə avtomobilin qarşısındakı məkanı skan edir. O, havanı analiz edərək donmuş yağışın xırda damcılarının və ya buz kristallarının mövcudluğunu dəqiq müəyyənləşdirir, həmçinin yol örtüyündəki buzlanmanı aşkar edə bilir. Sistem təhlükə qeydə alan kimi sürücünü sürəti azaltmağın vacibliyi barədə xəbərdar edir.
Universitetin statistikasına görə, buzlanma hava şəraiti ilə əlaqəli yol-nəqliyyat hadisələrinin təxminən hər beşincisinin səbəbidir. Eyni zamanda, sürətin cəmi 5–15 km/saat azaldılması toqquşma zamanı ağır nəticələrin riskini iki dəfə azalda bilər.
“Yalnız sürəti azaltmaqla, sürüşkən sahə barədə əvvəlcədən məlumatınız olduqda, bir çox həyat xilas edə bilərsiniz”, deyə professor Renno vurğulayır.
Bu datçiklər artıq aviasiyada sınaqdan keçirilib, çünki orada buzlanma ciddi təhlükə yaradır. İndi isə kosmik tədqiqatlar və meteorologiyanın kəsişməsində yaranmış bu texnologiya sürücüləri gizli təhlükələr barədə əvvəlcədən xəbərdar etməyə və əlverişsiz hava şəraiti ilə bağlı qəzaların qarşısını almağa hazırdır.
MONETAR.AZ
