Süni intellekt dünyasının aparıcı startaplarından olan ABŞ-ın "Anthropic" şirkəti, Çin korporasiyalarının onun xidmətlərinə icazəsiz çıxış əldə etmək cəhdlərinə qarşı nəzarət mexanizmlərini kəskin şəkildə sərtləşdirib. "Financial Times" (FT) qəzetinin dünən məlumatlı mənbələrə istinadən yaydığı hesabata görə, bəzi Çin texnologiya nəhənglərinin tətbiq olunan coğrafi məhdudiyyətləri müxtəlif alternativ sxemlərlə aşması bu addımın atılmasına səbəb olub.
Şirkətin daxili qaydalarına əsasən, Çin şirkətlərinin və onların nəzarətində olan hər hansı xarici törəmə qurumların "Anthropic" tərəfindən hazırlanan "Claude" süni intellekt modellərindən istifadə etməsi qəti şəkildə qadağandır.
Nəşrin araşdırması göstərir ki, rəsmi qadağalara baxmayaraq, Çinin ən böyük fintex və sosial media korporasiyaları "Claude" sistemlərinə daxil olmaq üçün müxtəlif hüquqi və texniki boşluqlardan yararlanıblar. Bu üsullar ABŞ və ya Çin qanunvericiliyini birbaşa pozmasa da, "Anthropic"in istifadəçi müqaviləsi şərtlərinə (Terms of Service) tamamilə ziddir. Şirkət öz əməkdaşlarını "Anthropic" xidmətləri ilə təmin etmək üçün Sinqapurdakı xarici törəmə bölməsinin adına qeydiyyatdan keçirilmiş korporativ hesablar alıb.
Şirkət rəsmi korporativ hesab aça bilmədiyi üçün öz proqramçı və mühəndislərinin şəxsi olaraq aldığı, lakin Çindən VPN vasitəsilə daxil olduqları "Claude" abunəliklərinin xərclərini şirkət büdcəsindən kompensasiya edib.
Bir sıra Çin şirkətləri isə birbaşa "Anthropic" platformasına müraciət etmək əvəzinə, rəsmi tərəfdaş olan Microsoft-un Azure bulud platforması və onun xarici infrastrukturları üzərindən "Claude" modellərinə API çıxışı əldə ediblər.
"Financial Times" yazır ki, "Anthropic" süni intellekt modellərinin Çin tərəfindən hərbi və ya strateji məqsədlərlə öyrənilməsinin (reverse engineering) qarşısını almaq üçün monitorinqi rəqəmsal detektiv səviyyəsinə qaldırıb.
Bu hadisə sadəcə bir şirkətin daxili qaydaları ilə məhdudlaşmır. ABŞ hökumətinin Çinə qarşı tətbiq etdiyi qabaqcıl çip və yarımkeçirici sanksiyaları fonunda, Çin şirkətlərinin birbaşa ABŞ-da yerləşən böyük dil modellərinə (LLM) ehtiyacı kritik həddə çatıb. "Anthropic"in bu addımı qlobal texnoloji soyuq müharibənin proqram təminatı və alqoritmlər cəbhəsində daha da kəskinləşəcəyinin növbəti göstəricisidir.
MONETAR.AZ
