Dövlət İmtahan Mərkəzi (DİM) bu gün iyulun 26-da musiqi sənəti istiqaməti üzrə nəzəriyyə fənlərindən test imtahanlarına start verib. İmtahanlar Bakı, Gəncə və Naxçıvan şəhərlərində elektron formatda təşkil olunur.
İmtahan prosesi iki növbə üzrə keçirilir. Birinci növbədə 21, 25, 26, 28, 32, 33 və 36-cı komissiyalar üzrə namizədlər saat 10:00-da imtahana başlayıblar. Bir saat davam edən bu mərhələdən sonra ikinci növbə üzrə 20, 24, 27, 29, 30, 69, 73 və 75-ci komissiyaların iştirakçıları saat 14:00-da biliklərini sınayacaqlar.
DİM-in məlumatına görə, imtahanlar kompüter vasitəsilə həyata keçirilir. İştirakçılar imtahanı başa vurduqdan dərhal sonra, yaxud ayrılmış vaxt bitdikdən sonra nəticələrini elektron sistem üzərindən görə bilirlər. Yekun nəticələr daha sonra Mərkəzin rəsmi internet səhifəsində də yerləşdiriləcək.
İmtahan nəticələri ilə bağlı müraciətlərə baxılması üçün Apellyasiya Komissiyası iyulun 27 və 28-də fəaliyyət göstərəcək. Komissiya hər iki gün saat 14:00-dan 17:00-dək Dövlət İmtahan Mərkəzinin Bakı şəhəri, Nəsimi rayonu, Həsən Əliyev küçəsi 299 ünvanında yerləşən əsas inzibati binasında müraciətləri qəbul edəcək.
