“Bloomberg” və texnologiya sahəsində fəaliyyət göstərən mənbələrin məlumatlarına görə, “Apple” oktyabrın 28-də Los-Ancelesdə “Pro and Tell” adlı xüsusi təqdimat tədbiri keçirməyi planlaşdırır. Şirkətin Qlobal Marketinq üzrə baş vitse-prezidenti Qreq Josviakın (Greg Joswiak) da təsdiqlədiyi bildirilən tədbirdə kompüter və planşet məhsul xəttinin yenilənməsi gözlənilir.
Gözlənilən yeniliklər arasında OLED displey və sensor ekranla təchiz olunacaq yeni “MacBook Pro” modelləri xüsusi yer tutur. Məlumatlara əsasən, M5 Pro və M5 Max prosessorları ilə işləyəcək cihazlar daha nazik korpusa, “iPhone” modellərində istifadə olunan Dynamic Island interfeysinə və toxunma idarəetməsinə uyğunlaşdırılmış macOS interfeysinə malik ola bilər.
Şirkətin 2 nanometrlik texnoloji proses əsasında hazırlanmış yeni M6 çipi ilə təchiz olunan 14 düymlük “MacBook Pro” və yenilənmiş “iMac” modelini də təqdim edəcəyi iddia olunur. Planşet seqmentində isə OLED displeyli və ön kamerası üfüqi istifadə üçün yerləşdirilmiş yeni nəsil “iPad mini” modelinin nümayişi gözlənilir. Məlumatlara görə, yeni planşetin satışlarına noyabrın 6-da başlanıla bilər.
“Apple”ın ağıllı ev ekosistemini genişləndirmək istiqamətində də yeni məhsul hazırladığı bildirilir. “HomeView” adlı mərkəzi qurğunun Face ID və süni intellekt imkanlarından istifadə edərək ev sakinlərini tanıması, fərdi təqvim və mesajları göstərməsi, eləcə də ev avtomatlaşdırma sistemlərini idarə etməsi nəzərdə tutulur. Qurğunun FaceTime zəngləri, musiqi yayımı və səsli idarəetmə funksiyalarını birləşdirəcəyi iddia edilir. Bu məhsul “Google” və “Amazon”un ağıllı ev həlləri ilə rəqabət apara bilər.
Yeni məhsulların təqdimatı “Apple”ın texnologiya bazarında mövqelərini gücləndirmək cəhdlərinin davamı kimi qiymətləndirilir. Bununla yanaşı, şirkətin iPhone 18 Pro modellərinə tələbatın zəifləməsi və 2 nanometrlik çiplər üzrə sifarişlərin azaldılması ilə bağlı iddialar fonunda daha yüksək gəlirlilik potensialına malik məhsullara diqqət yetirdiyi bildirilir.
Yarımkeçirici istehsalında TSMC-nin 2 nanometrlik texnologiyası və Asiyadakı komponent təchizatı da texnologiya şirkətləri üçün strateji əhəmiyyətini qoruyur. Eyni zamanda, süni intellekt sahəsində artan xərclər və faiz dərəcələri ilə bağlı qeyri-müəyyənlik iri texnologiya şirkətlərinin investisiya qərarlarına təsir edən əsas amillər sırasındadır.
Qeyd edək ki, təqdimatla bağlı sadalanan məhsul xüsusiyyətləri, satış tarixləri və texniki göstəricilər rəsmi təsdiq tələb edən məlumatlardır.
MONETAR.AZ
