“Apple” şirkəti ənənəvi payız təqdimatı çərçivəsində ağıllı saatlarının yeni nəsli olan “Watch Series 12” modelini nümayiş etdirib. Yeni cihazların sentyabrın 18-dən etibarən dünya üzrə satışa çıxarılması gözlənilir.
Şirkət yeni nəsildə əsas diqqəti sağlamlıq göstəricilərinin izlənilməsinə yönəldib. “Watch Series 12” istifadəçinin nəbzini daha dəqiq və daha tez-tez ölçür, yuxu rejimini izləyir və toplanan məlumatlar əsasında ətraflı statistika təqdim edir.
“Apple” bununla yanaşı, “Health” tətbiqini də yeniləyib. Tətbiqin əsas səhifəsində istifadəçinin sağlamlıq vəziyyəti ilə bağlı ən vacib göstəricilər daha əlçatan formada təqdim olunur. Sistem həmçinin toplanmış məlumatları təhlil edərək istifadəçiyə fərdi tövsiyələr verir. Bunlar daha çox yatmaq, fiziki aktivliyi artırmaq və ya gün ərzində daha çox maye qəbul etmək kimi məsləhətlər ola bilər.
Yeni funksiyaların işləməsində “Watch Series 12”, “iPhone” və yeni nəsil “Siri” süni intellekt köməkçisi arasındakı inteqrasiya mühüm rol oynayır.
“Apple” daha təkmil “Watch Ultra 4” modelini də təqdim edib. Şirkət yeni versiyada bir dəfəlik enerji yüklənməsi ilə işləmə müddətini 50 saata qədər artırıb və addımların hesablanmasının dəqiqliyini yüksəldib. “Watch Ultra 4” baza “Watch” modelində təqdim olunan yeni funksiyaları da özündə birləşdirir.
Şirkət hesab edir ki, “Watch Ultra 4” intensiv idman və digər fiziki fəaliyyətlərlə məşğul olan istifadəçilər üçün ağıllı saatlar sırasında əsas seçim olaraq qalır.
MONETAR.AZ
