Yeni beynəlxalq araşdırma Avropada süni intellekt (AI) istifadəsinin ölkələr üzrə qeyri-bərabər şəkildə yayıldığını göstərir. Məlumat Eurostat və IAB UK göstəricilərinə əsaslanır. Eurostatın məlumatlarına görə, Şimali Avropa ölkələri AI istifadəsində açıq şəkildə lider mövqe tutur, bəzi regionlarda isə göstəricilər xeyli aşağıdır.
Araşdırmaya əsasən, Avropada süni intellektdən ən çox istifadə edən ölkə Norveçdir – burada əhalinin 56,3 faizi son üç ayda AI alətlərindən istifadə etdiyini bildirir.
İlk sıralarda həmçinin Danimarka (48,4%), İsveçrə (47,0%), Estoniya (46,6%) və Finlandiya (46,3%) yer alır. Bu ölkələrdə süni intellekt artıq gündəlik istifadə səviyyəsinə yaxınlaşır.
Məlumatlara görə, Avropanın böyük iqtisadiyyatları AI istifadəsində orta və ya aşağı göstəricilərlə seçilir. Məsələn, Almaniya və Böyük Britaniyada istifadə səviyyəsi təxminən üçdə bir əhali ilə məhdudlaşır. Bu isə Şimali Avropa ölkələri ilə müqayisədə xeyli aşağı göstəricidir.
Cənubi Avropada nəticələr daha qarışıqdır. İtaliya və Türkiyədə süni intellekt istifadə səviyyəsi təxminən 20 faiz civarındadır. Bu göstərici Şimali Avropa ölkələri ilə müqayisədə iki dəfədən çox aşağıdır. Eyni zamanda İspaniya (38%) və Portuqaliya (39%) orta səviyyədə yer alır və Qərbi Avropa ölkələrinə yaxın nəticələr göstərir.
Araşdırma göstərir ki, süni intellektdən istifadə xüsusilə gənclər arasında daha sürətlə yayılır. Məsələn, Böyük Britaniyada ümumi göstərici 34 faiz olsa da, 15–24 yaş qrupunda gündəlik istifadə daha yüksəkdir.
MONETAR.AZ
