Pekində 19-cu beynəlxalq avtosalon açılıb. Sərgidə təxminən 1,5 min avtomobil təqdim olunur ki, onlardan 180-i yenilikdir. Motor-şouda 20-dən çox ölkə iştirak edir, lakin tarixdə ilk dəfə olaraq yerli brendlər ekspozisiyanın 60%-dən çoxunu təşkil edir.
Təşkilatçılar əsas trend kimi elektromobillərin və hibridlərin üstünlük təşkil etdiyini bildiriblər. Bununla yanaşı, klassik daxili yanma mühərriklərini sevənlər üçün də müsbət xəbərlər var. “Za rulem” jurnalının baş redaktoru Maksim Kadakov sərginin böyük hissəsini nəzərdən keçirdikdən sonra belə deyib:
“Avropa avtomobilləri arasında əsasən BMW i7 diqqəti cəlb edir. Bu, böyük yürüş ehtiyatına (728 km-ə qədər) və sürətli şarj imkanına malik yenilənmiş elektrik ‘yeddilik’ modelidir. Təbii ki, qiyməti də yüksəkdir — təxminən 120 min avro. Yenilənmiş Mercedes-Benz S-Class isə daha dərin modernizasiyadan keçib və plug-in hibrid versiyası bir qədər uzadılıb. Audi isə Çin konserni ilə birlikdə yeni subbrend yaradıb və artıq ikinci modelini təqdim edib. Birincisi — elektrik sportbek uğursuz sayılmışdı, indi isə krossover nümayiş etdirilib. Ümumilikdə, avtomobil istehsalçıları arasında əsas meyl avtomobil sahəsindən kənar və ya tam fərqli sahələrdə fəaliyyət göstərən şirkətlərlə əməkdaşlıqlardır.
İkinci trend — hibridləşmədir, yəni tam elektrik avtomobillərindən tədricən uzaqlaşma. Üçüncü istiqamət isə idarəetmənin avtomatlaşdırılmasıdır (ən azı qismən). Bir çox avtomobildə Çin standartına uyğun olaraq faralarda və arxa işıqlarda firuzəyi LED işıqlar peyda olur ki, bu da avtomobilin avtomatik rejimdə hərəkət etdiyini göstərir. Bu isə daha yüksək səviyyəli avtopilot sistemlərinin tətbiq edildiyini bildirir.
Sevindirici haldır ki, çinli istehsalçılar iri mühərriklər mövzusundan imtina etmirlər. Great Wall Motor artıq ikinci ildir ki, ağır yolsuzluq avtomobilləri və pikaplar üçün nəzərdə tutulan yeni V8 mühərrikinin istehsalöncəsi prototipini təqdim edir. Bu mühərrik dizel-hibrid sistemlə də işləyə bilir. Çin mühəndisləri yalnız dizayn deyil, həm də yeni texnologiyalar — mühərriklər, transmissiyalar və sürətlər qutuları üzərində işləyirlər. Bu temp davam etsə, onlar qlobal avtomobil istehsalçılarını ciddi şəkildə geridə qoya bilərlər.”
Avtoistehsalçılar ziyarətçiləri yalnız futuristik stendlər və konseptlərlə deyil, həm də sərgi çərçivəsində aparılan praktik təcrübələrlə cəlb edirlər. Məsələn, şüşə kubun içində -33°C temperaturda dondurulmuş vəziyyətdə BYD Leopard 3 kompakt elektrik yolsuzluq avtomobili enerji ilə doldurulur. Yeni batareyanın hətta bu cür ekstremal şəraitdə belə 12 dəqiqəyə tam doldurulacağı vəd edilir. Adi şəraitdə isə tam şarj cəmi 9 dəqiqə çəkir.
