Microsoft Corp. təxminən 4 800 əməkdaşını ixtisar edəcəyini açıqlayıb. Şirkətin bildirdiyinə görə, bu addım prioritet inkişaf istiqamətlərinə daha çox resurs yönəltmək məqsədilə həyata keçirilən restrukturizasiya proqramının tərkib hissəsidir və qlobal işçi qüvvəsinin təxminən 2,1%-ni əhatə edir.
Əməkdaşlara ünvanlanan daxili məktubda şirkətin icraçı vitse-prezidenti və insan resursları üzrə baş direktoru (CHRO) Emi Koulman restrukturizasiyanı texnologiya sektorunda sürətlə dəyişən biznes mühiti ilə əlaqələndirib.
“Biznesimiz dəyişir, çünki ətrafımızdakı dünya dəyişir. Şirkətlər fəaliyyət göstərdikləri sənayenin dəyişib-dəyişməyəcəyini seçə bilməzlər, lakin həmin dəyişikliklərə uyğunlaşıb-uyğunlaşmayacaqlarına qərar verə bilərlər”, — deyə Koulman bildirib.
Microsoft xüsusi vurğulayıb ki, ixtisarlar əməkdaşların süni intellekt texnologiyaları ilə əvəz olunması ilə bağlı deyil. Şirkət kadr çevikliyinə və daxili rotasiyalara üstünlük verdiyini qeyd edib. Belə ki, son bir il ərzində 4 mindən çox əməkdaş şirkət daxilində yeni vəzifələrə keçirilib. Bundan əlavə, müvafiq proqramda iştirak hüququ olan əməkdaşların 30%-dən çoxu yaxın vaxtlarda könüllü təqaüd proqramından yararlanıb.
Restrukturizasiya çərçivəsində iki əsas istiqamətdə dəyişikliklər həyata keçirilir:
- Kommersiya bölməsi – Ötən həftə təqdim edilən Frontier Company konsepsiyasına uyğun olaraq, mühəndislik üzrə mütəxəssislər texnologiyaların tətbiqini sürətləndirmək məqsədilə birbaşa müştərilərlə işləyən komandaların tərkibinə cəlb olunur.
- Xbox Gaming bölməsi – Uzunmüddətli inkişaf strategiyası çərçivəsində bölmədə struktur dəyişiklikləri aparılır. Bu prosesə mövcud layihələrin və intellektual mülkiyyət portfelinin qorunması məqsədilə dörd oyun studiyasının yeni rəhbərliyin tabeliyinə verilməsi də daxildir.
Şirkət bildirib ki, ixtisara düşən əməkdaşlara işdənçıxarma müavinətləri ödəniləcək, həmçinin onların yeni məşğulluq imkanlarına çıxışını dəstəkləyən proqramlar təqdim olunacaq. Bununla yanaşı, Emi Koulman gələcəkdə şirkətin digər biznes bölmələrində də əlavə struktur dəyişikliklərinin istisna edilmədiyini qeyd edib.
MONETAR.AZ
