Çikaqo Əmtəə Birjasında (CBOT) soya lobyası fyuçersləri bu gün bahalaşıb. Noyabr kontraktının (SX26) qiyməti 8,5 sent və ya 0,66 faiz artaraq bir buşel üçün 12,89¼ dollara yüksəlib.
Soya fyuçerslərinin bahalaşmasına ABŞ-da məhsul yığımının analitiklərin gözləntilərindən daha yavaş tempdə davam etməsi təsir göstərib. Kontraktın qiyməti cümə günü son beş həftənin minimumuna düşmüşdü.
ABŞ Kənd Təsərrüfatı Nazirliyinin (USDA) son məlumatlarına görə, bazar gününə olan vəziyyətə əsasən fermerlər soya məhsulunun 25 faizini yığıblar.
Bu göstərici son beş ilin orta səviyyəsi olan 33 faizdən və analitiklərin 29 faizlik gözləntisindən aşağıdır. Yığım tempinin proqnozlardan geri qalması bazarda soya tədarükü ilə bağlı narahatlıqları artırıb.
Analitiklərin fikrincə, hazırda quru hava şəraiti fermerlərə sahələrdə yığım işlərini davam etdirməyə imkan verir. Bununla belə, ötən həftə yağan yağışlardan sonra bəzi bölgələrdə torpağın hələ də rütubətli qalması yığım prosesini müəyyən qədər ləngidir.
MONETAR.AZ
