“Bloomberg” agentliyinin məlumatına görə, Bitcoinin qiymətinin 87 min dollar səviyyəsindən yuxarı qalxmaq cəhdləri uğursuz olub və kriptovalyuta yenidən 80 min dollar həddinə yaxınlaşıb. İnvestorlar qiymət enişinin texniki və makroiqtisadi səbəblərini qiymətləndirirlər.
Eyni zamanda, proqnoz bazarlarında Bitkoinin ilin sonunadək daha yüksək qiymətlərə çatacağı ilə bağlı gözləntilər zəifləyib. “Polymarket” platformasındakı mərclərə əsasən, kriptovalyutanın 100 min dollara çatması ehtimalı 17 faiz, 110 min dollara yüksəlməsi ehtimalı isə 9 faiz qiymətləndirilir.
Bitcoinin bahalaşmasına mane olan əsas amillərdən biri investorların satış qərarlarıdır. Son iki ildə kriptovalyuta alan bəzi investorlar 87 min dollar və daha yüksək qiymətlərdə alış xərclərini qarşılamaq imkanı əldə etdikdə aktivlərini satmağa üstünlük verirlər.
“Glassnode” analitiklərinin qiymətləndirməsinə görə, investorlar cari ildə artıq iki dəfə Bitkoinin yüksəlişini bu səviyyədə dayandırıblar. Mənfəətin reallaşdırılması və satış təzyiqinin artması nəticəsində qiymət sonrakı dövrlərdə 25 faiz və ya daha çox geriləyə bilər.
Bu vəziyyət bazarda yüksəlişin davamlılığı ilə bağlı suallar yaradır və qiymətin yuxarı səviyyələrdə möhkəmlənməsini çətinləşdirir.
Bitcoinin qiyməti inflyasiya göstəriciləri, Yaxın Şərqdəki gərginlik və qlobal maliyyə bazarlarında risk iştahı kimi makroiqtisadi amillərdən təsirlənir. Oktyabrın ortalarında kriptovalyutanın fond bazarı ilə korrelyasiyası mayın sonundan bəri ən yüksək səviyyəyə çatıb.
Süni intellekt sektorunda fəaliyyət göstərən şirkətlərin səhmlərindən ibarət portfel oktyabrın əvvəlindən bəri 15 faiz ucuzlaşıb. Bu, iyul ayından bəri ən zəif göstərici kimi təqdim olunur. Bitkoin isə oktyabrda təxminən 4 faiz dəyər itirib və iyundan bəri ən zəif aylıq dinamika nümayiş etdirib.
“STS Digital” şirkətinin ABŞ bölməsinin rəhbəri Ceff Anderson bildirib ki, Bitcoin texnologiya sektorunun risk dinamikasına həssas aktiv olaraq qalır. Onun sözlərinə görə, süni intellekt şirkətlərinin qiymətləndirilməsi ilə bağlı çətinliklər və borc riskləri kriptovalyutanın qiymətinə də təsir göstərir.
“Glassnode” analitikləri Bitkoin üçün 81 500 dollar səviyyəsini mühüm texniki hədd kimi qiymətləndirirlər. Bu göstərici ABŞ-da spot Bitcoin birja fondlarına (ETF) daxil olan vəsaitlərin orta alış qiyməti ilə əlaqələndirilir.
Kriptovalyutanın bu səviyyədən aşağıda möhkəmlənməsi ETF investorlarının orta hesabla zərərə düşməsi demək ola bilər. Eyni zamanda, bu həddin itirilməsi bazarda yaxın dəstək səviyyələrindən birinin zəifləməsinə səbəb ola bilər.
Analitiklərin qiymətləndirməsinə görə, 81 500 dollar səviyyəsinin aşağı istiqamətdə qırılması halında növbəti əsas dəstək zonası 77 500 dollar ətrafında yerləşir.
Bitcoinin yaxın perspektivdəki dinamikası investorların satış davranışından, texnologiya sektorundakı dəyişikliklərdən və mühüm texniki səviyyələrin qorunub saxlanılmasından asılı olacaq.
MONETAR.AZ
