“Apple” şirkəti yeni nəsil M6 prosessoru ilə təchiz edilmiş 24 düymlük iMac və baza konfiqurasiyalı 14 düymlük MacBook Pro modellərini təqdim edib.
Yeni qurğuların xarici dizaynı əvvəlki nəsillərlə müqayisədə dəyişməyib. Əsas yeniliklər daxili arxitektura və məhsuldarlıqla bağlıdır. Belə ki, iMac M4 prosessorundan birbaşa M6-ya keçid edib, MacBook Pro modelində isə ötən ilki M5 çipi M6 ilə əvəzlənib.
Apple-ın açıqladığı göstəricilərə əsasən, yeni iMac M4 ilə müqayisədə süni intellekt tapşırıqlarını beş dəfəyədək daha sürətlə yerinə yetirir. Qrafik performansı isə iki dəfə artıb.
14 düymlük MacBook Pro modelində M6 prosessoru M5 ilə müqayisədə qrafik performansını 30 faizə, süni intellekt iş yüklərində sürəti isə 25 faizə qədər artırır. Qurğu 12 nüvəli prosessor və 12 nüvəli qrafik prosessorla təchiz edilib.
Hər iki model Wi-Fi 7 və Bluetooth 6 simsiz əlaqə standartlarını dəstəkləyir. Yeni iMac-də 2,5 Gb Ethernet bağlantısı və əvvəlki nəsillə müqayisədə iki dəfə yüksək SSD sürəti də nəzərdə tutulub.
14 düymlük MacBook Pro isə 24 saatadək batareya ömrü və sürətli enerji doldurma imkanı təqdim edir. Şirkətin məlumatına görə, bu göstərici Mac kompüterləri arasında rekord səviyyədir.
Yeni qurğular üçün ilkin sifarişlərin oktyabrın 28-də başlayacağı, rəsmi satışların və çatdırılmanın isə noyabrın 6-dan həyata keçiriləcəyi bildirilir.
24 düymlük iMac-in başlanğıc qiyməti 10 nüvəli model üçün 1 499 dollar, 12 nüvəli versiya üçün isə 1 699 dollar təşkil edir. 14 düymlük MacBook Pro modelinin başlanğıc qiyməti 1 999 dollardır.
Yeni iMac və MacBook Pro modelləri şirkətin oktyabr ayı üzrə elanlar seriyasının ikinci günündə təqdim olunub. Həftənin ilk günü “Apple” yenilənmiş iPad mini modelini nümayiş etdirib. Yeni planşetin ekranı və suya davamlılıq müdafiəsi ilə bağlı təkmilləşdirmələrə malik olduğu bildirilir.
“Bloomberg”in məlumatına görə, oktyabrın 27-28-də şirkətin təqdimat seriyasının sensorlu ekrana malik ilk MacBook Pro modeli ilə davam etməsi gözlənilir.
Məlumata əsasən, yeni nəsil sensorlu MacBook Pro daha nazik və yüngül korpus, incə ekran çərçivələri və OLED displey texnologiyası ilə təchiz oluna bilər.
MONETAR.AZ
