İsveçrə Bank Əməkdaşları Assosiasiyası qanunvericilərə ünvanladığı məktubda xəbərdarlıq edib ki, daha sərt kapital tələbləri UBS-i baş qərargahını ölkə xaricinə köçürməyə məcbur edərsə, İsveçrədə 12 minədək iş yeri ixtisar oluna bilər. Bu barədə bazar günü “NZZ am Sonntag” qəzeti məlumat yayıb.
Assosiasiyanın qiymətləndirməsinə görə, UBS-in İsveçrədə çalışan təxminən 34 min əməkdaşından 10 min–12 min nəfərin vəzifəsi ləğv edilə bilər. Bu ixtisarlar “Credit Suisse”in inteqrasiyası çərçivəsində hazırda həyata keçirilən işdən çıxarmalara əlavə olunacaq.
Xəbərdarlıq İsveçrə parlamentinin aşağı palatasının müvafiq komitəsinin UBS-in xarici bölmələri üçün kapital tələblərini müzakirə etməyə hazırlaşdığı bir vaxtda səsləndirilib.
2026-cı ilin sentyabrında parlamentin yuxarı palatası UBS-in xarici bölmələrinin 90% həcmində birinci dərəcəli əsas kapital — Common Equity Tier 1 (CET1) ilə təmin olunmasını nəzərdə tutan təklif irəli sürüb.
UBS bu səviyyədə kapital tələbini həddindən artıq sərt hesab edir. Bankın İdarə Heyətinin sədri daha əvvəl bildirib ki, yeni tələblər həddindən artıq ağır olarsa, şirkət İsveçrədəki gələcəyini yenidən nəzərdən keçirməli olacaq.
Məlumata görə, UBS-in bəzi səhmdarları bankın İsveçrədən köçməsini dəstəkləyirlər. Mənbələr isə bankın baş qərargahın başqa ölkəyə köçürülməsini və ya digər maliyyə institutu ilə birləşməsini nəzərdə tutan ehtiyat planlar hazırladığını bildirirlər.
İsveçrə Bank Əməkdaşları Assosiasiyası məktubunda tərəfləri “həyat qabiliyyətli kompromis” tapmağa çağırıb. Təşkilat xəbərdarlıq edib ki, kapital tələblərinin daha da sərtləşdirilməsi UBS-in İsveçrədə fəaliyyətini davam etdirməsini təhlükə altına qoya bilər.
MONETAR.AZ
