Bitkoin geosiyasi gərginlik fonunda 70 min dollardan yuxarı səviyyədə dayanıqlılıq nümayiş etdirsə də, hələlik qoruyucu aktiv kimi çıxış etmir.
Monetar.az xəbər verir ki, ekspertlərin fikrincə, klassik qoruyucu aktiv böhran zamanı, investorların riskli aktivlərdən kütləvi şəkildə uzaqlaşdığı ilk günlərdə öz dəyərini qoruyub saxlamalıdır. Bitkoin isə likvidlik çatışmazlığı dövründə texnologiya şirkətlərinin səhmləri ilə birlikdə satıla bilər.
Ekspertlərin fikrincə, bitkoinin 70 min dollardan yuxarı səviyyədə qalması bazarın dərinləşdiyini və panik satışların daha sürətlə qarşılandığını göstərir. Lakin bu, kriptovalyutaya hələ qoruyucu aktiv statusu vermir.
Ekspertlər qızıl və bitkoinin eyni meyarlarla qiymətləndirilməsinin düzgün olmadığını bildirirlər. Onların fikrincə, qızıl əsasən maliyyə sistemindəki böhranlardan qorunma vasitəsi kimi qəbul edilir. Bitkoin isə valyuta məhdudiyyətləri, milli valyutanın dəyərsizləşməsi və maliyyə sistemindən asılılıq kimi risklərə alternativ təqdim edə bilər.
Ekspertlərin proqnozuna əsasən, yaxın həftələrdə bitkoinin 60-68 min dollar aralığında hərəkət etməsi əsas ssenari olaraq qalır. 68 min dollardan yuxarı möhkəmlənmə qiymətin 70-72 min dollara yüksəlməsinə, 62 min dollar səviyyəsinin itirilməsi isə 60 min dollara doğru təzyiqin artmasına səbəb ola bilər.
Ekspertlər bildirirlər ki, bitkoinin yüksək volatilliyi və qlobal likvidlikdən asılılığı onun tamhüquqlu qoruyucu aktivə çevrilməsinə hələ imkan vermir.
