"Jefferies" analitikləri hesab edirlər ki, valyutaların dəyərsizləşməsi və ABŞ-da büdcə vəziyyəti ilə bağlı narahatlıqlar metalların qiymətlərinə dəstək verə bilər. Şirkətin fikrincə, dağ-mədən sektorunun səhmləri investorlar üçün bu risklərdən qorunma vasitələrindən biri ola bilər.
Analitiklər qızıl və kriptovalyuta bazarındakı son qiymət artımlarını erkən siqnal kimi qiymətləndirərək, yaxın dövrdə mis və digər sənaye metallarının da oxşar dinamika nümayiş etdirə biləcəyini bildiriblər.
"Jefferies" Arizona ştatında mis yataqlarını inkişaf etdirən Faraday şirkətini "al" (buy) reytinqi ilə analitik əhatəsinə daxil edib. Eyni reytinq Kanadadakı "Gibraltar" mis-molibden mədəni, Arizonadakı "Florence" mis layihəsi və digər mis, qızıl və niobium aktivlərinə sahib olan Trekor şirkətinə də verilib.
Bundan əlavə, şirkət IAG, EGO, HL və LUNR üzrə də analitik əhatəyə başlayıb. "Jefferies" hesab edir ki, bazarlar artan büdcə kəsiri, yüksək dövlət borcu və valyutaların dəyərsizləşməsi risklərini hələ tam qiymətləndirməyib.
Şirkət həmçinin ABŞ və Kanada arasında polad və alüminium məhsullarına tətbiq olunan bəzi tariflərin 50%-dən 25%-ə endirilməsini nəzərdə tutan ilkin ticarət razılaşmasının sektor üçün müsbət amil ola biləcəyini qeyd edib.
Analitiklər, eyni zamanda, BHP-nin 2026-cı maliyyə ilinin ikinci yarısı üzrə EBITDA, xalis borc və dividend göstəricilərinin bazar gözləntilərini üstələdiyini vurğulayıblar. Bununla yanaşı, onlar Çində kredit artımının rekord aşağı səviyyədə qalmasının və iqtisadiyyatın davam edən çətinliklərlə üzləşməsinin sənaye metalları bazarı üçün əsas risklərdən biri olaraq qaldığını bildiriblər.
MONETAR.AZ
