Çinin texnologiya nəhəngi Huawei yeni flaqman smartfonu Mate XT2-ni təqdim edib. Şirkətin ilk üçqat qatlanan smartfonu olan model tam açılmış vəziyyətdə 10,2 düymlük (25 sm-dən çox) ekranı ilə planşet ölçülərinə yaxınlaşır.
Huawei bildirir ki, Mate XT2 şirkətin yeni nəsil Kirin 9050 Pro prosessoru ilə təchiz edilib. Smartfonun başlanğıc qiyməti 19 999 yuan (təxminən 3 000 ABŞ dolları), ən yüksək konfiqurasiyasının qiyməti isə 24 999 yuan (təxminən 3 730 ABŞ dolları) təşkil edir. Cihazın satışlarına 12 sentyabr tarixindən start veriləcək.
İndiyədək üçqat qatlanan smartfon təqdim edən yeganə digər istehsalçı Cənubi Koreyanın Samsung şirkəti olub. Şirkət belə modeli 2025-ci ilin dekabrında bazara çıxarsa da, qısa müddət sonra satışını dayandırmışdı. Counterpoint Research-in qiymətləndirməsinə əsasən, 2025-ci ildə qlobal qatlanan smartfon bazarında Samsung 40%-lik payla lider olub, Huawei isə 30%-lik payla ikinci yerdə qərarlaşıb.
Analitiklər premium seqmentdə qatlanan smartfonlara tələbatın artmaqda davam etdiyini bildirirlər. Omdia-nın proqnozuna görə, bu kateqoriya üzrə qlobal satışlar 2028-ci ilədək 2025-ci illə müqayisədə iki dəfə artaraq 36 milyon ədədə çatacaq.
Bazar rəqabətinin daha da güclənəcəyi gözlənilir. Sentyabrın 7-də Çinin digər istehsalçısı Xiaomi-nin yeni flaqman qatlanan smartfonunu təqdim edəcəyi, sentyabrın 9-da keçiriləcək təqdimatda isə Apple-ın ilk qatlanan iPhone modelini nümayiş etdirəcəyi proqnozlaşdırılır.
MONETAR.AZ
