Qızıl bazarlarında çərşənbə axşamı ucuzlaşma qeydə alınıb. İnvestorlar ABŞ-də açıqlanacaq yeni inflyasiya göstəricilərini gözlədiyi üçün qiymətli metalın unsiyası 4 300 dollar səviyyəsinə düşüb. Bu göstərici 2025-ci ilin dekabrından bəri müşahidə olunan ən aşağı səviyyədir.
Bazar proqnozlarına görə, may ayında ABŞ-də inflyasiyanın 4,2 faizə yüksəlməsi gözlənilir ki, bu da son üç ilin ən yüksək göstəricisi ola bilər. Artımın əsas səbəbi kimi enerji qiymətlərindəki bahalaşma göstərilir.
Ötən həftə açıqlanan ABŞ məşğulluq hesabatı da bazarlara təsir edib. Hesabata əsasən, may ayında ölkədə 172 min yeni iş yeri yaradılıb ki, bu da gözləntiləri üstələyib. Bu göstəricilər fonunda investorlar ABŞ Federal Ehtiyat Sisteminin (FED) bu il faiz artımı ehtimalını artırıblar. Hazırda dekabr ayında faiz artımına 70 faizlik ehtimal verilir.
Eyni zamanda Yaxın Şərqdə gərginliklərin azalması da diqqət çəkib. İran və İsrail tərəfləri ABŞ Prezidenti Donald Trampın çağırışından sonra qarşılıqlı hücumları dayandırdıqlarını bildiriblər. Bu isə neft qiymətlərində azalmaya səbəb olaraq inflyasiya təzyiqlərini bir qədər zəiflədib. Lakin bazarlarda qeyri-müəyyənlik hələ də qalmaqdadır.
MONETAR.AZ
