Bakı Fond Birjasının (BFB) 2026-cı ilin yanvar-iyul ayları üzrə göstəricilərinə əsasən, investisiya şirkətləri arasında əməliyyat həcmləri üzrə ciddi fərq müşahidə olunur. Hesabat dövründə 13 bazar iştirakçısının ümumi əməliyyat dövriyyəsi 49,5 milyard manat təşkil edib.
Məlumatlar göstərir ki, kapital bazarında əsas yük bir neçə böyük investisiya şirkətinin üzərinə düşür. İlk beş şirkət ümumi dövriyyənin 92 faizindən çoxunu formalaşdırıb.
Renkinqə “ABB İnvest İnvestisiya Şirkəti” 23,4 milyard manatlıq əməliyyat həcmi ilə liderlik edir. Şirkətin bazardakı payı 47,25 faiz təşkil edib. İkinci pillədə “PAŞA Kapital” 8,6 milyard manat, üçüncü yerdə isə “Unicapital” 5 milyard manat dövriyyə ilə qərarlaşıb.
Bu üç şirkətin ümumi payı 74 faizdən çoxdur. Digər iştirakçıların əksəriyyətinin dövriyyəsi isə daha aşağı səviyyədə qalıb.
BFB-də fəaliyyət göstərən investisiya vasitəçilərinin nəticələri göstərir ki, bazarda ən böyük aktivlik dövlət qiymətli kağızları, repo əməliyyatları və iri həcmli institusional sövdələşmələr hesabına formalaşır.
“ABB İnvest”, “PAŞA Kapital” və “Unicapital” həm bank qrupları ilə əlaqələri, həm də böyük müştəri bazasına malik olmaları səbəbindən bazarda əsas mövqeləri qoruyurlar.
İlk beşlikdə yer alan “CPM-İnvest” və “İnvest-Az” da 4 milyard manatdan çox dövriyyə ilə bazarın əsas iştirakçıları sırasında qərarlaşıb.
Renkinq göstərir ki, bazarda fəaliyyət göstərən digər səkkiz iştirakçının ümumi payı təxminən 7,6 faiz təşkil edir.
Bu şirkətlər əsasən fərdi investorlarla iş, korporativ qiymətli kağızlar, xarici bazarlara çıxış və xüsusi maliyyə xidmətləri istiqamətində fəaliyyət göstərirlər.
Bazar iştirakçılarının dövriyyəsi üzrə göstəricilər investisiya xidmətləri sektorunda konsentrasiyanın yüksək olduğunu göstərir. Bir neçə böyük şirkətin üstün mövqeyi bazarda likvidliyin formalaşmasına kömək etsə də, orta və kiçik investisiya şirkətlərinin fəaliyyət imkanlarının genişlənməsi kapital bazarının daha balanslı inkişafına təsir edə bilər.
Mütəxəssislərin fikrincə, korporativ istiqrazların emissiyası, yeni maliyyə alətlərinin tətbiqi və fərdi investorların bazara cəlb olunması kiçik iştirakçıların rolunu artıran əsas amillərdən ola bilər.
MONETAR.AZ
