Bazar məlumatlarına əsasən, iyun ayında Çinin smartfon bazarında 28 milyon cihaz həcmində pərakəndə satış qeydə alınıb ki, bu da may ayı ilə müqayisədə 62% çox və ötən ilin müvafiq ayının göstəricisindən 3% yüksəkdir.
Sıçrayışlı artım "618" böyük endirim kampaniyası dövrünə təsadüf etsə də, 2026-cı ilin birinci yarısı üzrə ümumi tədarük həcmi 7% azalıb.
Yaddaş çiplərinin qiymətinə olan təzyiq iyun ayında aşağı qiymət seqmentinə aid smartfonların tədarükünün 14% düşməsinə gətirib çıxarıb. Orta və yüksək qiymət seqmentləri isə illik ifadədə birgə təxminən 10% böyüyüb. Bu, "Huawei" və digər "Android" istehsalçılarının həyata keçirdiyi promokampaniyalar sayəsində mümkün olub. Ümumi tədarük həcmində büdcə modellərinin payı iyun ayında rekord dərəcədə aşağı səviyyəyə enib.
"Apple" şirkətinin satılan ədəd sayına görə bazar payı illik ifadədə artsa da, bu artım may ayı ilə müqayisədə daha az olub, çünki rəqib brendlər də analoji aksiyalar keçiriblər. "iPhone 17 Pro" modelinə edilən endirimlər may ayında payın artmasını təmin etmişdi ki, bu da, görünür, tələbatın bir hissəsini daha əvvəlki dövrə sürüşdürüb.
İyun ayında rəqiblər 3 000–5 000 yuan qiymət aralığında təkliflər təqdim ediblər. "Huawei"in premium seqmentdəki tədarükləri əvvəlki ayın səviyyəsində qalıb: SMIC-in "N+3" texnoloji prosesi ilə istehsal olunan prosessorların yüksək maya dəyəri qiymət siyasətində çevikliyi məhdudlaşdırır.
Çin smartfon istehsalçıları sentyabr ayında gözlənilən məhsul təqdimatları ərəfəsində 3 000–5 000 yuan seqmentində promokampaniyaları fəallaşdırıblar. Satış kanallarına göndərilən tədarük həcmləri pərakəndə satış səviyyəsindən aşağı enib ki, bu da anbar ehtiyatlarını maydakı 3,9 aydan iyunda 3,2 aya qədər azaltmağa imkan verib, lakin bu göstərici hələ də normadan yüksək olaraq qalır.
Orta satış qiymətləri may ayındakı yüksək səviyyələrlə müqayisədə enib, lakin 2025-ci ilin iyun ayı ilə müqayisədə 15% baha qalıb. İllik ifadədəki artım müqayisəolunan kateqoriyalarda qiymətlərin yüksəlməsini və büdcə cihazlarının payının azalmasını əks etdirib. "Qualcomm" və "MediaTek" şirkətləri isə öz prosessorlarının qiymətlərini qaldırıblar.
MONETAR.AZ
