Böyük Britaniyanın ABŞ-dan çox Avropa İttifaqı ilə yaxınlaşmağa yönələn siyasəti Londonun Vaşinqtonla ticarət sazişini genişləndirmək səyləri üçün “problem” yaradır. Bunu ABŞ Prezidenti Donald Trampın baş ticarət danışıqçısı bildirib.
ABŞ-ın ticarət nümayəndəsi Ceymison Qrir “Financial Times”a müsahibəsində deyib ki, Böyük Britaniya Aİ tərəfindən müəyyən edilmiş qaydalara riayət etməyə davam etməklə və bazarını Amerika malları üçün məhdud saxlamaqla Brexit-in verdiyi imkanlardan tam istifadə etməyib. Onun sözlərinə görə, Britaniya hələ də “kifayət qədər yüksək tarifləri” qoruyub saxlayır.
“Biz bunu məhz belə qiymətləndiririk. Britaniya tərəfi ilə apardığım danışıqlara əsaslanaraq deyirəm: ‘Baxın, siz Aİ-dən azadsınız. Niyə müəyyən qədər liberallaşmaya, Amerika standartlarına uyğun istehsal olunan malları, o cümlədən kənd təsərrüfatı məhsullarını qəbul etməyəsiniz?’” – deyə Qrir bildirib.
“Onlar isə cavab verirlər: ‘Yaxşı, biz gözləməliyik və Aİ-nin nə deyəcəyini görməliyik’. Məhz bu, bizim üçün problemdir və vəziyyəti daha da mürəkkəbləşdirir”, – o əlavə edib.
Böyük Britaniyanın Brexit sayəsində əldə etdiyi tənzimləyici azadlıqdan istifadə edib-etmədiyi barədə suala Qrir qısa şəkildə “Xeyr, etmir” cavabını verib.
Bu açıqlamalar Böyük Britaniya ilə Aİ arasında münasibətlərin möhkəmləndirilməsi istiqamətində səylərin artdığı bir dövrə təsadüf edir. Birləşmiş Krallığın Aİ-dən rəsmi çıxmasından altı il sonra London və Brüssel arasında əməkdaşlığın genişləndirilməsi müzakirə olunur. Eyni zamanda, Tramp administrasiyasının yeni tariflər tətbiq etmək hədələri, Qrenlandiya üzərində nəzarət planları və ABŞ-ın NATO-ya dəstəyini azaltmaqla bağlı mövqeyi Avropadakı müttəfiqlər arasında narahatlıq yaradıb.
Böyük Britaniyanın Baş naziri Endi Börnem də çərşənbə günü parlamentdə çıxışı zamanı Brexit-in Britaniya iqtisadiyyatına zərər vurduğunu bildirərək Brüssellə münasibətlərin yaxınlaşdırılmasının tərəfdarı olduğunu ifadə edib.
MONETAR.AZ
