Çin Kanada ilə ticarət sahəsində mövcud fikir ayrılıqlarını azaltmaq və ikitərəfli əməkdaşlığı genişləndirmək niyyətindədir. Bu barədə Çinin ticarət naziri Van Ventaşo Kanadanın ticarət naziri Maninder Sidxu ilə görüşündə bildirib.
Çin Ticarət Nazirliyinin çərşənbə günü yaydığı məlumata görə, tərəflər görüş zamanı ticarət-iqtisadi münasibətləri, ənənəvi və yeni sahələrdə əməkdaşlıq imkanlarını, eləcə də qarşılıqlı ticarət narahatlıqlarını müzakirə ediblər.
Van Ventaşo Çinin Kanada ilə birlikdə fikir ayrılıqlarının aradan qaldırılmasına və əməkdaşlıq istiqamətlərinin artırılmasına çalışdığını vurğulayıb. Onun sözlərinə görə, Pekin iki ölkə arasında mövcud problemlərin sayını azaltmaq və qarşılıqlı fəaliyyət sahələrini genişləndirmək istəyir.
Qeyd edək ki, Çin və Kanada arasında ilkin ticarət razılaşması yanvar ayında Kanadanın Baş naziri Mark Karninin Pekinə səfəri zamanı əldə olunub. İkitərəfli münasibətlərin yaxşılaşdırılmasına yönələn razılaşma elektromobillərə və kanola məhsullarına tətbiq edilən gömrük rüsumlarının azaldılmasını nəzərdə tuturdu.
Çinin ticarət naziri son dövrdə iki ölkə arasında ticarət məsləhətləşmələrinin müsbət istiqamətdə inkişaf etdiyini bildirib. O, ilkin razılaşma çərçivəsində rüsum güzəştlərinin müddətinin uzadılması məsələsinin də müzakirə olunduğunu qeyd edib. Bununla belə, Çin Ticarət Nazirliyi bu istiqamətdə əlavə təfərrüat açıqlamayıb.
Van Ventaşo ənənəvi iqtisadi sahələrdə də əməkdaşlığın gücləndirilməsinin vacibliyini vurğulayıb. Onun sözlərinə görə, enerji, kənd təsərrüfatı, su məhsulları və istehlak malları üzrə qarşılıqlı ticarətin genişləndirilməsi üçün imkanlar mövcuddur.
Bununla yanaşı, tərəflər yüksək texnologiyalı istehsal, ekoloji təmiz enerji və intellektual kənd təsərrüfatı kimi yeni istiqamətlərdə də əməkdaşlığı inkişaf etdirməlidirlər. Pekin və Ottava arasında aparılan danışıqlar ticarət maneələrinin azaldılması ilə yanaşı, iki ölkə arasında iqtisadi əlaqələrin daha geniş sahələri əhatə etməsinə yönəlib.
MONETAR.AZ
