Avropa İttifaqında dövlət borcunun ÜDM-ə nisbəti 2026-cı ilin ikinci rübündə 82,9%-ə çatıb. Ən yüksək göstərici Yunanıstanda qeydə alınıb. Burada dövlət borcu ölkənin illik iqtisadi məhsulunun 140,8%-nə bərabərdir.
Monetar.az xəbər verir ki, Eurostat-ın məlumatları əsasında hazırlanan araşdırmaya görə, Aİ ölkələrinin ümumi dövlət borcu 2026-cı ilin ikinci rübündə 15,95 trilyon avro təşkil edib.
Dövlət borcunun ÜDM-ə nisbətinə görə Yunanıstan 140,8%-lə birinci, İtaliya 139,9%-lə ikinci yerdə qərarlaşıb. Fransada bu göstərici 119,1%, Belçikada 110,2%, İspaniyada isə 101,4% olub. Beləliklə, Aİ-nin beş ölkəsində dövlət borcu ÜDM-i ötüb.
Portuqaliya 92,5%, Finlandiya 90,2%, Avstriya isə 83,6% göstərici ilə Aİ-nin orta səviyyəsindən yüksək nəticə göstərib. Almaniyada dövlət borcunun ÜDM-ə nisbəti 63,4% təşkil edib.
Reytinqin digər ucunda Estoniya qərarlaşıb. Ölkədə dövlət borcunun ÜDM-ə nisbəti 26,1% olub. Danimarka və Lüksemburqda da bu göstərici 30%-dən aşağıdır.
Yunanıstanın yüksək borc yükü uzun illər davam edən büdcə kəsirləri, iqtisadiyyatın struktur problemləri və 2009-cu ildə başlayan suveren borc böhranı ilə əlaqələndirilir. Sonrakı dövrdə ölkə beynəlxalq maliyyə yardımı alıb, bunun müqabilində sərt qənaət tədbirləri və iqtisadi islahatlar həyata keçirib.
Bununla belə, Yunanıstan borc yükünü azaltmaq istiqamətində irəliləyiş əldə edib. Eurostat-ın məlumatına əsasən, 2026-cı ilin ikinci rübündə dövlət borcunun ÜDM-ə nisbəti əvvəlki ilin eyni dövrü ilə müqayisədə 11,2 faiz bəndi azalıb.
Avropa ölkələrində dövlət borcunun artmasına əhalinin yaşlanması, dövlət xərcləri, 2008-ci il maliyyə böhranı və COVID-19 pandemiyası dövründə həyata keçirilən dəstək tədbirləri təsir göstərib. Son dövrdə müdafiə, infrastruktur və borclara xidmət xərcləri də büdcələrə əlavə təzyiq yaradır.
Qeyd edək ki, Avropa İttifaqının fiskal qaydalarına əsasən, dövlət borcunun ÜDM-ə nisbəti üçün istinad həddi 60%, büdcə kəsiri üçün isə 3% müəyyən edilib. Bu hədlərin aşılması ölkələrin əlavə fiskal nəzarət və büdcə düzəlişləri ilə üzləşməsinə səbəb ola bilər.
