"AstraZeneca" Çin biotexnologiya şirkəti "Dizal Pharmaceutical" ilə ağciyər xərçənginin müalicəsində istifadə olunan "Sunvozertinib" preparatının qlobal hüquqlarının əldə edilməsinə dair razılıq əldə edib. Şirkətin Şanxay Fond Birjasına təqdim etdiyi məlumata görə, saziş çərçivəsində "AstraZeneca" ilkin mərhələdə 600 milyon ABŞ dolları həcmində avans ödənişi edəcək.
"Zegfrovy" ticarət adı ilə də tanınan "Sunvozertinib" preparatı ABŞ və Çində yerli yayılmış və ya metastatik qeyri-kiçikhüceyrəli ağciyər xərçəngi diaqnozu qoyulmuş yetkin xəstələrin müalicəsi üçün təsdiqlənib.
Amerika Xərçəng Cəmiyyətinin məlumatına əsasən, qeyri-kiçikhüceyrəli ağciyər xərçəngi bütün ağciyər xərçəngi hallarının təxminən 77 faizini təşkil edir və bu xəstəliyin ən geniş yayılmış forması hesab olunur.
324 xəstənin iştirakı ilə aparılmış son mərhələli beynəlxalq klinik tədqiqatın nəticələrinə görə, preparat xəstəliyin proqressivləşmədiyi median sağqalma müddətini 10,3 aya qədər uzadıb. Müqayisə üçün, standart kimyaterapiya alan xəstələrdə bu göstərici 7,5 ay təşkil edib.
Müqaviləyə əsasən, "Dizal Pharmaceutical" yalnız 600 milyon dollarlıq ilkin ödənişlə kifayətlənməyəcək. Şirkət klinik inkişaf mərhələlərinin uğurla tamamlanması və kommersiya hədəflərinin yerinə yetirilməsindən asılı olaraq əlavə 900 milyon dollara qədər mərhələli (milestone) ödənişlər də əldə edə bilər.
Razılaşmaya əsasən, "AstraZeneca" preparatın dünya üzrə hazırlanması, qeydiyyatı, istehsalı və kommersiyalaşdırılması üçün eksklüziv hüquqlara sahib olacaq.
Şirkətin onkologiya və hematologiya bölməsinin icraçı vitse-prezidenti Deyv Fredrikson bildirib ki, bu əməkdaşlıq məhdud müalicə seçimlərinə malik xəstələr üçün innovativ hədəfli terapiyanın daha geniş coğrafiyada əlçatan olmasına imkan verəcək.
Analitiklərin fikrincə, saziş "AstraZeneca"nın onkologiya portfelini daha da gücləndirməklə yanaşı, Çin biotexnologiya sektorunda hazırlanmış innovativ preparatların qlobal bazara çıxışı baxımından da mühüm addım hesab olunur.
MONETAR.AZ
