Son 40 ildə dünyanın ən varlı insanlarının sərvət topladığı sahələr əhəmiyyətli dərəcədə dəyişib. 1980-ci illərin sonlarında daşınmaz əmlak maqnatları ön planda olduğu halda, son illərdə texnologiya, elektron ticarət, lüks məhsullar, kosmik sənaye və elektrik avtomobilləri milyarderlərin əsas sərvət mənbələrinə çevrilib.
Monetar.az xəbər verir ki, 1987-1994-cü illərdə Yaponiyanın daşınmaz əmlak maqnatları Yoshiaki Tsutsumi və Taikichiro Mori dünyanın ən varlı şəxsləri sırasında ilk yerləri tutublar. Həmin dövrdə böyük sərvətlər əsasən torpaq və daşınmaz əmlak üzərində qurulurdu.
1995-2007-ci illərdə isə proqram təminatı sənayesi ön plana çıxıb. “Microsoft”un həmtəsisçisi Bill Qeyts 13 il ardıcıl olaraq dünyanın ən varlı şəxsi olub.
2008-ci ildə investor Uorren Baffet “Berkshire Hathaway” şirkəti vasitəsilə ilk sıraya yüksəlib. 2010-2013-cü illərdə isə telekommunikasiya sektorunun nümayəndəsi Karlos Slim dörd il ərzində dünyanın ən varlı şəxsi olub.
2018-2021-ci illərdə elektron ticarət sahəsi liderliyə yüksəlib. “Amazon”un qurucusu Ceff Bezos bu dövrdə dünyanın ən varlı şəxsi kimi ön plana çıxıb.
2023-2024-cü illərdə isə lüks məhsullar sənayesi texnologiya sektorunun nəhənglərini geridə qoyub. “LVMH” şirkətinin sahibi Bernar Arno və ailəsi dünyanın ən varlı şəxsləri siyahısında ilk yeri tutub.
2022-ci ildə, eləcə də 2025-2026-cı illərdə isə kosmik sənaye və elektrik avtomobilləri ön plana çıxıb. “Tesla” və “SpaceX” şirkətlərinin rəhbəri İlon Mask dünyanın ən varlı şəxsi mövqeyinə yüksəlib.
Beləliklə, son 40 ildə dünyanın ən böyük sərvətləri daşınmaz əmlakdan proqram təminatına, telekommunikasiyadan elektron ticarətə və lüks məhsullara, nəhayət, kosmik sənaye və elektrik avtomobillərinə doğru istiqamət dəyişib.
