Azərbaycanda dövlət qurumlarının içməli su və qablaşdırılmış suya tələbatı satınalma müsabiqələrinin nəticələrində də özünü göstərir. 2026-cı ilin əvvəlindən sentyabrın 4-dək təqdim olunan məlumatlara əsasən, müxtəlif dövlət qurumları və publik hüquqi şəxslər tərəfindən içməli su və əlaqəli məhsul və xidmətlərin alınması üzrə 28 satınalma yekunlaşdırılıb. Bu satınalmalarda qalib şirkətlər və şəxslərə ödəniləcək məbləğlər bir neçə yüz manatdan yüz minlərlə manata qədər dəyişib.
Ən böyük məbləğ 395,6 min manatdır
Təqdim olunan siyahıda ən yüksək məbləğ 395 654 manat təşkil edir. Bu vəsait “TİKİLMƏKDƏ OLAN OBYEKTLƏRİN MÜDİRİYYƏTİ” PHŞ tərəfindən Gəncə şəhərində içməli su təchizatı və kanalizasiya şəbəkələrinin yenidən qurulması layihəsi üzrə maliyyə hesabatlarının hazırlanmasına görə “RSM Azerbaijan” MMC-yə ödəniləcək.
Birbaşa içməli su alışları arasında isə ən yüksək məbləğlərdən biri “Unisell” MMC-nin qalib olduğu satınalmadır. Bakı Baş Gömrük İdarəsinin dəftərxana, təsərrüfat malları və qablaşdırılmış içməli su üzrə satınalmasının məbləği 61 977,79 manat olub.
“İkar-Qrup” və “İpəksu” da böyük müqavilələr əldə edib
Dövlət Radiotezliklər İdarəsinin içməli suların satın alınması üzrə müsabiqəsində “İkar-Qrup” MMC qalib elan edilib. Təklifin qiyməti 45 340,32 manat təşkil edib.
Eyni şirkət “Azəridmanservis” MMC-nin içməli suyun satın alınması üzrə müsabiqəsində də qalib olub. Bu müqavilənin məbləği 49 250,84 manatdır.
“İpəksu” MMC isə bir neçə dövlət qurumunun satınalmasında qalib olub. Şirkət Azərbaycan Qida Təhlükəsizliyi İnstitutunun 33 989,9 manat, Azərbaycan Respublikası Dövlət İmtahan Mərkəzinin 48 496,82 manat, Azərbaycan Mərkəzi Bankının isə 19 831,08 manat məbləğində satınalmalarını əldə edib. Beləliklə, yalnız təqdim olunan bu üç müqavilənin ümumi dəyəri 102 317,8 manat təşkil edir.
İçməli su satınalmalarında ən çox təkrarlanan qaliblərdən biri “Pure Life” MMC olub. Şirkət təqdim olunan siyahıda ən azı 6 satınalmada qalib kimi göstərilir. “Pure Life” MMC İnformasiya Kommunikasiya Texnologiyaları Agentliyinin 3 282 manat, Respublika Elmi-Texniki Kitabxananın 1 605,5 manat, İstehlak Mallarının Ekspertizası Mərkəzinin 2 349,4 manat, Azərbaycan Dövlət Gənc Tamaşaçılar Teatrının 1 220 manat, Milli İdman Tibb və Reabilitasiya Elmi-Praktiki İnstitutunun 5 925 manat və Sanator-Kurort Reabilitasiya Mərkəzinin 21 420,07 manat məbləğində satınalmalarında qalib olub.
Siyahıda ən son yekunlaşan satınalma isə KOBİA-nın keçirdiyi müsabiqədir. Azərbaycan Respublikasının Kiçik və Orta Biznesin İnkişafı Agentliyinin “İçməli suyun” satın alınması üzrə müsabiqəsində “Şirinsu” MMC qalib elan olunub. Təklifin qiyməti 28 904,1 manat olub. Satınalma 4 sentyabr 2026-cı il saat 09:27-də yekunlaşıb.
Bundan bir neçə gün əvvəl – sentyabrın 2-də – Ekologiya və Təbii Sərvətlər Nazirliyinin qablaşdırılmış içməli suyun satın alınması üzrə müsabiqəsində “Mud Volcano” MMC qalib olub. Müqavilənin dəyəri 3 507,55 manat təşkil edib.
Qaliblər arasında fiziki şəxslər də var
Maraqlı məqam ondan ibarətdir ki, siyahıda yalnız şirkətlər deyil, fiziki şəxslər də qalib kimi göstərilib.
Belə ki, Aqşin Salam oğlu Quliyev müxtəlif dövlət qurumlarının üç satınalmasında qalib olub:
“İnnovasiyalar Mərkəzi” MMC – 11 045 manat;
“Azərxalça” ASC – 2 790 manat;
“İçərişəhər” Dövlət Tarix-Memarlıq Qoruğu İdarəsi – 8 997,4 manat.
Bu üç satınalmanın ümumi məbləği 22 832,4 manatdır.
Digər fiziki şəxslərdən CAVAHİR ZAHİD QIZI MƏMMƏDOVA Cəbrayıl Rayon İcra Hakimiyyətinin qablaşdırılmış içməli su və dispenser aparatı üzrə 2 624,2 manatlıq, VÜQAR SALEH OĞLU MƏMMƏDOV isə iki satınalma üzrə ümumilikdə 2 514,09 manatlıq müqavilə əldə edib.
Ən böyük satınalmalar
Təqdim olunan 28 nəticə arasında məbləğinə görə ən yüksək satınalmalar belədir:
- “RSM Azerbaijan” MMC — Tikilməkdə olan Obyektlərin Müdiriyyəti PHŞ — 395 654 manat
- “Unisell” MMC — Bakı Baş Gömrük İdarəsi — 61 977,79 manat
- “Universal Pro” QSC — Regional Su Meliorasiya Xidməti PHŞ — 51 250,94 manat
- “İkar-Qrup” MMC — “Azəridmanservis” MMC — 49 250,84 manat
- “İpəksu” MMC — Dövlət İmtahan Mərkəzi — 48 496,82 manat
- “İkar-Qrup” MMC — Dövlət Radiotezliklər İdarəsi — 45 340,32 manat
- “İpəksu” MMC — Azərbaycan Qida Təhlükəsizliyi İnstitutu — 33 989,9 manat
- “Şirinsu” MMC — KOBİA — 28 904,1 manat
Qeyd edək ki, siyahıda “içməli su” ilə yanaşı su təchizatı, nasosxana avadanlıqları, su anbarlarının dezinfeksiyası və digər əlaqəli işlər üzrə satınalmalar da yer alır.
Monetar.az
