“Bharat Petroleum Corp.” yaxın günlərdə cari maliyyə ilində İraq neftinin ilk partiyasını qəbul edəcək. Şirkətin maliyyə direktoru bildirib ki, uyğun gəmilər mövcud olduğu halda, Fars körfəzi ölkələrindən FOB şərtləri ilə əlavə neft tədarükünə də hazırdır.
Şirkətin maliyyə direktoru Vetsa Ramakrişna Gupta çərşənbə axşamı səhmdarların illik ümumi yığıncağının yekunlarına dair keçirilən mətbuat konfransında bildirib ki, yükün gəmidən-gəmiyə boşaldılması üçün nefti Fuceyraya çatdıracaq gəmi tapılıb.
İraq İranla müharibə və bu su yolundan keçən gəmilərə hücumlar fonunda Hürmüz boğazının bağlanması səbəbindən neft tədarükündə çətinliklərlə üzləşib. Qlobal enerji tədarükünün təxminən beşdə biri bu boğazdan keçir.
Guptanın sözlərinə görə, “Bharat Petroleum”a ayda təxminən 2 milyon barel İraq nefti lazımdır. Gəmi artıq Hürmüz boğazını keçib və xam neftin bir neçə gün ərzində şirkətin neftayırma zavodlarına çatacağı gözlənilir. Gupta gəminin adını açıqlamayıb.
O qeyd edib ki, şirkət sığorta xərclərinin məqbul səviyyədə olması və gəmi sahiblərinin müvafiq riskləri öz üzərinə götürməyə razılaşması şərtilə Hürmüz boğazı ətrafından yükləri qəbul etməyə hazırdır.
Guptanın bildirdiyinə görə, gəminin 30-45 günədək müddətə gecikməsi ehtimalı nəzərə alınsa belə, tədarük kommersiya baxımından sərfəli olaraq qalarsa, şirkət bu cür yükləri nəzərdən keçirəcək.
MONETAR.AZ
