“Morgan Stanley” 2030-cu ilə qədər Avropanın iri energetika şirkətlərinin hasilat artımı perspektivlərini qiymətləndirmək üçün təxminən 4 min neft və qaz yatağı üzrə məlumatları təhlil edib.
Bankın araşdırmasına əsasən, sektor üzrə orta illik hasilat artımı proqnozu 2025–2030-cu illər üçün 2,9%-ə yüksəlib. Müqayisə üçün, ötənilki proqnozda bu göstərici 1,2% təşkil edirdi. Hasilat üzrə sürüşən dördillik proqnoz isə 8,3% yaxşılaşıb.
Təhlil edilən şirkətlər arasında “Eni” hasilat artımı baxımından ən yüksək potensiala malik şirkət kimi qiymətləndirilib. Bank 2030-cu ilə qədər şirkətin hasilatının orta hesabla 4,5% artacağını və bu dinamikanın 2034-cü ilə qədər davam edəcəyini proqnozlaşdırır.
Əksinə, “Equinor”un qrup daxilində hasilatı artırmaq baxımından ən böyük çətinliklərlə üzləşəcəyi gözlənilir.
“Morgan Stanley” “Shell” üzrə reytinqini “Bazardan yuxarı” (Overweight) səviyyəsinə yüksəldərək şirkəti əsas investisiya seçimlərindən (“Top Pick”) biri elan edib. Bank bunu şirkətin əməliyyat göstəricilərində müşahidə olunan yaxşılaşma, dividendlərin artım tempinin sürətlənəcəyi gözləntiləri və səhmdarlar üçün təxminən 15%-lik ümumi gəlirlilik potensialı ilə əlaqələndirib.
Bununla yanaşı, bank “BP” üzrə də “Bazardan yuxarı” reytinqini qoruyub saxlayıb. Analitiklər bunu xalis borcun şirkətin hədəflərindən daha sürətlə azalacağına dair gözləntilər, cəlbedici qiymətləndirmə və gələcək artımı dəstəkləyə biləcək bir sıra mühüm katalizatorlarla izah edirlər.
Tədqiqat çərçivəsində Avropanın aparıcı neft-qaz şirkətlərinin hasilat proqnozlarını hazırlamaq üçün bir neçə konsaltinq şirkətinin ayrı-ayrı yataqlar və aktivlər üzrə məlumat bazalarından istifadə olunub.
MONETAR.AZ
